ایرانی سفیر کا پاکستان کی ثالثی کوششوں کا اعتراف، محسن نقوی نے مذاکرات کی کامیابی پر مبارکباد دی

اسلام آباد میں تعینات ایرانی سفیر رضا امیری مقدم نے کہا ہے کہ پاکستان کی بروقت سفارتی کوششوں کے نتیجے میں حالیہ مذاکرات میں مثبت پیش رفت سامنے آئی ہے، جو خطے میں امن کے قیام کی جانب اہم قدم ثابت ہو سکتی ہے۔

سوشل میڈیا پلیٹ فارم ایکس پر جاری اپنے بیان میں ایرانی سفیر نے بتایا کہ پاکستان کے وفاقی وزیر داخلہ محسن نقوی نے تہران سے واپسی پر انہیں فون کر کے ایرانی حکام سے ہونے والے مذاکرات کی کامیابی پر مبارکباد دی۔

رضا امیری مقدم کے مطابق مذاکرات میں ہونے والی پیش رفت ایران کے مؤقف، اس کی مسلح افواج کی ثابت قدمی، عوامی مزاحمت اور پاکستان کی جانب سے کی جانے والی ثالثی کوششوں کا مشترکہ نتیجہ ہے۔

انہوں نے کہا کہ اگر تمام متعلقہ فریقین سنجیدگی اور مثبت رویے کے ساتھ آگے بڑھتے رہے تو یہ سفارتی پیش رفت خطے میں امن اور استحکام کی نئی راہیں کھول سکتی ہے۔

ایرانی سفیر نے پاکستانی قیادت کی سفارتی کوششوں کو بھی سراہتے ہوئے شہباز شریف اور سید عاصم منیر کے ثالثی کردار کا خصوصی ذکر کیا۔ انہوں نے مزید کہا کہ نائب وزیراعظم و وزیر خارجہ اسحاق ڈار اور وزیر داخلہ محسن نقوی کی کوششیں بھی قابل تحسین ہیں۔

بیان میں امید ظاہر کی گئی کہ پاکستان کی یہ سفارتی کاوشیں خطے میں دیرپا امن اور مثبت تبدیلی کے قیام میں مددگار ثابت ہوں گی۔ آخر میں ایرانی سفیر نے پاکستانی حکومت اور متعلقہ حکام کا مذاکراتی عمل میں تعاون پر شکریہ بھی ادا کیا۔