روس نے دنیا کے طاقتور ترین جوہری میزائل سرمات کا کامیاب تجربہ کر لیا

روسی صدر ولادی میر پیوٹن نے میزائل کے کامیاب تجربے کا اعلان کرتے ہوئے کہا کہ سرمات میزائل 35 ہزار کلومیٹر تک مار کرنے کی صلاحیت رکھتا ہے اور جدید ترین دفاعی نظام کو بھی چکمہ دے سکتا ہے۔

پیوٹن کے مطابق یہ نیا بین البراعظمی بیلسٹک میزائل روس کی دفاعی صلاحیت کو مزید مضبوط بنائے گا اور اسے جدید جنگی تقاضوں کے مطابق تیار کیا گیا ہے۔

روسی صدر نے مزید بتایا کہ نئے “اوریشنک” میزائل نظام کو بھی جوہری وارہیڈز سے لیس کیا جا سکتا ہے۔ میڈیا رپورٹس کے مطابق روس اس میزائل نظام کو دو مرتبہ یو کرین کے خلاف استعمال کر چکا ہے۔

خبر ایجنسیوں کے مطابق نیا میزائل نظام رواں سال کے آخر تک روسی فوج کے حوالے کر دیا جائے گا، جس کے بعد روس کی عسکری اور دفاعی قوت میں مزید اضافہ متوقع ہے۔

ماہرین کے مطابق سرمات میزائل کو روس کے جدید ترین اسٹریٹجک ہتھیاروں میں شمار کیا جا رہا ہے، جو طویل فاصلے تک جوہری وارہیڈ لے جانے کی صلاحیت رکھتا ہے۔