یوکرین جنگ اختتام کے قریب، روس امن معاہدے کے لیے تیار ہے: ولادیمیر پوتن

روسی صدر ولادیمیر پوتن نے کہا ہے کہ یوکرین جنگ اپنے اختتام کے قریب پہنچ رہی ہے اور روس حتمی امن معاہدے کے لیے تیار ہے۔

صحافیوں سے گفتگو کرتے ہوئے صدر پوتن نے کہا کہ ماسکو کسی بھی ملک میں یوکرینی صدر ولادیمیر زیلنسکی سے ملاقات کے لیے آمادہ ہے، تاہم ایسی ملاقات صرف حتمی امن معاہدے پر دستخط کے مقصد کے لیے ہونی چاہیے۔

انہوں نے کہا کہ روس کا بنیادی مقصد اپنی قومی سلامتی کو یقینی بنانا ہے تاکہ مستقبل میں کسی بھی قسم کے خطرات سے بچا جا سکے۔ پوتن کے مطابق روس نے یوکرین کے ساتھ جنگی قیدیوں کے تبادلے کے لیے تجاویز پہلے ہی دے رکھی ہیں، لیکن کیف کی جانب سے تاحال کوئی باضابطہ جواب موصول نہیں ہوا۔

روسی صدر نے بتایا کہ روس نے 5 مئی کو 500 قیدیوں کی فہرست یوکرینی حکام کے حوالے کی تھی۔ انہوں نے امریکی صدر ڈونلڈ ٹرمپ کی جانب سے 9 سے 11 مئی تک جنگ بندی اور قیدیوں کے تبادلے کی تجویز کو انسانی بنیادوں پر مثبت اقدام قرار دیتے ہوئے کہا کہ روس نے اسے فوری طور پر قبول کر لیا تھا۔

پوتن نے دعویٰ کیا کہ یومِ فتح کی تقریبات کے دوران ممکنہ حملوں کے جواب میں روس کیف کے مرکزی علاقوں پر بڑے پیمانے پر میزائل حملوں کے لیے تیار تھا۔ ان کے مطابق اس ممکنہ صورتحال سے چین، بھارت، امریکا اور دیگر شراکت دار ممالک کو بھی آگاہ کیا گیا تھا۔

انہوں نے کہا کہ امریکی انتظامیہ یوکرین تنازع کے حل میں سنجیدہ دلچسپی رکھتی ہے، تاہم اصل مسئلہ روس اور یوکرین کے درمیان ہے۔ پوتن نے مغربی ممالک پر الزام عائد کیا کہ نیٹو کی توسیع کے معاملے پر روس کو دھوکہ دیا گیا، جو موجودہ بحران کی بڑی وجوہات میں شامل ہے۔

صدر پوتن نے واضح کیا کہ وہ زیلنسکی سے ملاقات سے انکار نہیں کر رہے، تاہم ایسی کسی بھی تجویز پر روس بات چیت کے لیے تیار ہوگا۔

انہوں نے ایران کی صورتحال پر بھی تشویش کا اظہار کرتے ہوئے کہا کہ خطے میں بڑھتی کشیدگی تمام فریقین کے لیے نقصان دہ ثابت ہو سکتی ہے، جبکہ روس کی جانب سے ایرانی افزودہ یورینیم کی منتقلی سے متعلق تجاویز اب بھی زیر غور ہیں۔