صبور علی نے اپنی ڈیڑھ سال کی بیٹی کو اسکول بھیجنے کی وجہ بتادی

پاکستانی اداکارہ صبور علی نے اپنی ڈیڑھ سالہ بیٹی سیرینا کو پری اسکول بھیجنے کی وجہ بتاتے ہوئے کہا ہے کہ اس سے بچی کی سماجی صلاحیتوں میں بہتری آرہی ہے۔

صبور علی نے کہا کہ انہوں نے اپنی بیٹی کی ابتدائی تعلیم سے متعلق بات کی۔ میزبان نے ڈیڑھ سال کی عمر میں بچی کے پری اسکول جانے پر حیرانی کا اظہار بھی کیا۔

سیرینا روزانہ چند منٹ پری اسکول جاتی ہیں

صبور علی نے بتایا کہ انہوں نے اپنی بیٹی سیرینا کو پری اسکول میں داخل کرایا ہے، جہاں فی الحال وہ صرف 15 سے 20 منٹ گزارتی ہے۔

اداکارہ کے مطابق سیرینا اسکول میں جاتی ہے، کھیلتی ہے اور پھر واپس آجاتی ہے۔ ان کا کہنا تھا کہ اس سرگرمی سے بیٹی کی سوشل اسکلز میں اضافہ ہورہا ہے۔

والدین سے کچھ دیر دور رہنا بھی ضروری ہے: صبور علی

صبور علی نے کہا کہ ان کے لیے یہ بھی ضروری تھا کہ بیٹی کچھ وقت والدین سے دور رہے تاکہ اسے یہ سمجھنے میں مدد ملے کہ والدین کی غیر موجودگی میں کس طرح رہنا ہے اور دوسروں کے ساتھ کیسے پیش آنا ہے۔

اداکارہ نے بتایا کہ اسکول کا تعارفی دن ایسا موقع تھا جب سیرینا بہت روئی اور انہیں خود بھی شرمندگی محسوس ہوئی، کیونکہ وہاں موجود دیگر بچے نہیں رو رہے تھے۔

ان کے مطابق سیرینا ویسے کافی سوشل بچی ہے، تاہم اب صورتحال یہ ہے کہ وہ اسکول سے واپس نہیں آنا چاہتی۔

سوشل میڈیا پر ملا جلا ردعمل

صبور علی کے انٹرویو کی ویڈیو سوشل میڈیا پر وائرل ہوگئی، جس کے بعد صارفین کی جانب سے اداکارہ کے فیصلے پر ملا جلا ردعمل سامنے آیا۔

کچھ صارفین نے کم عمری میں بچے کو اسکول بھیجنے کے فیصلے کو تنقید کا نشانہ بناتے ہوئے کہا کہ بچے کا بچپن انتہائی اہم ہوتا ہے، جبکہ دیگر صارفین نے صبور علی اور ان کے شوہر کے فیصلے کی حمایت کی۔