سان ڈیاگو کی مسجد پر فائرنگ، دو حملہ آوروں سمیت پانچ افراد ہلاک

( سان ڈیاگو / رائٹرز ) امریکی ریاست کیلیفورنیا کے شہر سان ڈیاگو میں واقع اسلامی مرکز پر پیر کے روز ہونے والی فائرنگ کے واقعے میں دو مشتبہ حملہ آوروں سمیت پانچ افراد ہلاک ہوگئے، جبکہ مسجد میں موجود تمام بچے محفوظ رہے۔

پولیس کے مطابق دو نوعمر مسلح افراد نے دوپہر کے وقت اسلامک سینٹر سان ڈیاگو کے باہر فائرنگ کی، جس کے نتیجے میں تین افراد جاں بحق ہوگئے۔ ہلاک ہونے والوں میں ایک سیکیورٹی گارڈ بھی شامل ہے، جس کے بارے میں پولیس چیف اسکاٹ واہل کا کہنا تھا کہ اس نے ممکنہ طور پر مزید جانی نقصان کو روکنے میں اہم کردار ادا کیا

سان ڈیاگو پولیس کے مطابق حملہ آوروں کی عمریں 17 اور 19 سال تھیں۔ دونوں کی لاشیں کچھ دیر بعد ایک گاڑی سے ملیں اور ابتدائی تحقیقات کے مطابق انہوں نے خود کو گولیاں مار کر خودکشی کی۔

واقعے کے وقت مسجد کے احاطے میں قائم اسکول میں بچے موجود تھے، تاہم پولیس کا کہنا ہے کہ تمام بچوں کو بحفاظت نکال لیا گیا اور کوئی بچہ زخمی نہیں ہوا

پولیس چیف اسکاٹ واہل نے بتایا کہ واقعے کی تحقیقات میں ایف بی آئی بھی شامل ہوگیا ہے اور حکام اس واقعے کو نفرت انگیز جرم کے طور پر دیکھ رہے ہیں

پولیس کے مطابق جائے وقوعہ سے چند بلاکس کے فاصلے پر ایک مالی پر بھی فائرنگ کی گئی، تاہم وہ محفوظ رہا۔ حکام یہ جاننے کی کوشش کر رہے ہیں کہ آیا دونوں واقعات کا آپس میں کوئی تعلق تھا یا نہیں

حکام کا کہنا ہے کہ واقعے کے محرکات اور حملے کی مکمل تفصیلات جاننے کے لیے تحقیقات جاری ہیں۔