ایران جنگ کے باعث ڈیزل بحران، امریکی اسکولوں کے بجٹ شدید دباؤ کا شکار

(لاس اینجلس) بین الاقوامی خبر رساں ادارے رائٹرز کے مطابق کئی امریکی ریاستوں میں اسکول انتظامیہ کو طلبہ کے لیے بس سروس برقرار رکھنے اور بیک اپ جنریٹرز چلانے کے لیے ہنگامی فنڈز استعمال کرنا پڑ رہے ہیں۔ واشنگٹن کے شہر یاکیما کاؤنٹی سے لے کر ٹیکساس کے ویکو، ٹیکساس تک متعدد اسکول اضلاع نے اضافی ایندھن اخراجات پورے کرنے کے لیے اپنے ریزرو فنڈز کھول دیے ہیں۔

الاسکا کے دور دراز علاقوں میں صورتحال مزید سنگین قرار دی جا رہی ہے، جہاں حکام سرد موسم میں بجلی اور حرارت کی فراہمی برقرار رکھنے کے لیے ڈیزل ذخائر حاصل کرنے کی کوششوں میں مصروف ہیں۔

یاکیما کاؤنٹی اسکول سپرنٹنڈنٹ ٹریور گرین نے موجودہ بحران کو “اونٹ کی کمر پر صرف تنکا نہیں بلکہ پورا بھوسے کا ڈھیر” قرار دیتے ہوئے کہا کہ بڑھتی ہوئی ایندھن قیمتوں نے تعلیمی اداروں کی مالی مشکلات میں غیرمعمولی اضافہ کر دیا ہے۔

توانائی ماہرین کے مطابق ایران جنگ اور آبنائے ہرمز میں بڑھتی کشیدگی کے باعث عالمی تیل سپلائی متاثر ہوئی ہے۔ بین الاقوامی توانائی ایجنسی کا کہنا ہے کہ مشرق وسطیٰ سے یومیہ لاکھوں بیرل تیل کی ترسیل متاثر ہونے کے بعد عالمی منڈی میں تیل کی قلت پیدا ہو رہی ہے، جس کے اثرات ڈیزل اور پٹرول کی قیمتوں میں نمایاں اضافے کی صورت میں سامنے آ رہے ہیں۔

رپورٹس کے مطابق امریکہ میں جنگ کے آغاز کے بعد ڈیزل قیمتوں میں غیرمعمولی اضافہ ریکارڈ کیا گیا ہے جبکہ ٹرکنگ، ایوی ایشن، زراعت اور تعلیمی شعبے سب سے زیادہ متاثر ہو رہے ہیں۔ امریکی ٹرکنگ انڈسٹری میں ڈیزل اخراجات تقریباً 50 فیصد تک بڑھنے کی اطلاعات ہیں۔

سیاسی تجزیہ کاروں کا کہنا ہے کہ بڑھتی ہوئی ایندھن قیمتیں امریکی صدر ٹرمپ کے لیے بھی بڑا سیاسی چیلنج بنتی جا رہی ہیں، خصوصاً ایسے وقت میں جب 2026 کے مڈٹرم انتخابات قریب آ رہے ہیں۔