وزیراعظم شہباز شریف کی امیرِ قطر سے ملاقات، شیخ حمد بن خلیفہ آل ثانی کے انتقال پر اظہارِ تعزیت

وزیراعظم محمد شہباز شریف ایک روزہ سرکاری دورے پر قطر کے دارالحکومت دوحہ پہنچے، جہاں انہوں نے حکومتِ پاکستان اور پاکستانی عوام کی جانب سے قطر کے سابق امیر اور امیرِ والد شیخ حمد بن خلیفہ آل ثانی کے انتقال پر گہرے رنج و غم اور دلی تعزیت کا اظہار کیا۔

وزیراعظم کے ہمراہ سابق وزیراعظم میاں محمد نواز شریف، نائب وزیراعظم و وزیر خارجہ سینیٹر محمد اسحاق ڈار، وفاقی وزیر اطلاعات عطاء اللہ تارڑ اور دیگر اعلیٰ حکام بھی موجود تھے۔

دورے کے دوران وزیراعظم شہباز شریف کی قیادت میں پاکستانی وفد نے امیرِ قطر شیخ تمیم بن حمد آل ثانی سے ملاقات کی اور مرحوم شیخ حمد بن خلیفہ آل ثانی کی خدمات کو خراجِ عقیدت پیش کیا۔

وزیراعظم نے کہا کہ مرحوم شیخ حمد بن خلیفہ آل ثانی ایک دوراندیش رہنما تھے جنہوں نے قطر کی ترقی، خوشحالی اور عالمی سطح پر اس کے مثبت کردار کو مضبوط بنانے میں تاریخی خدمات انجام دیں۔ انہوں نے مزید کہا کہ مرحوم نے نہ صرف اپنے ملک کی تعمیر و ترقی میں نمایاں کردار ادا کیا بلکہ خطے میں امن، استحکام اور تعاون کے فروغ کے لیے بھی اہم خدمات سرانجام دیں۔

شہباز شریف نے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور سوگوار خاندان سمیت قطری عوام کو صبر جمیل عطا کرے۔

اس موقع پر امیرِ قطر شیخ تمیم بن حمد آل ثانی نے وزیراعظم شہباز شریف، سابق وزیراعظم نواز شریف، نائب وزیراعظم اسحاق ڈار اور پاکستانی وفد کا ذاتی طور پر دوحہ آکر تعزیت کرنے پر شکریہ ادا کیا۔

امیرِ قطر نے کہا کہ پاکستانی قیادت کی آمد دونوں برادر ممالک کے درمیان گہرے، تاریخی اور دوستانہ تعلقات کی عکاسی کرتی ہے، جو ہر مشکل وقت میں ایک دوسرے کے ساتھ کھڑے رہنے کی روشن مثال ہیں۔

وزیراعظم شہباز شریف آج صبح ایک روزہ دورے پر دوحہ پہنچے تھے، جہاں دوحہ انٹرنیشنل ایئرپورٹ پر قطر کے نائب وزیراعظم اور وزیر مملکت برائے دفاع نے ان کا استقبال کیا۔ وزیراعظم کے ہمراہ اعلیٰ سطح کا پاکستانی وفد بھی موجود تھا۔

یاد رہے کہ قطر کے سابق امیر شیخ حمد بن خلیفہ آل ثانی کے انتقال پر حکومتِ پاکستان نے 13 جولائی کو قومی یومِ سوگ قرار دیا ہے۔ کابینہ ڈویژن کے نوٹیفکیشن کے مطابق ملک بھر میں قومی پرچم سرنگوں رکھا گیا تاکہ مرحوم کو خراجِ عقیدت پیش کیا جا سکے اور قطر کے عوام کے ساتھ اظہارِ یکجہتی کیا جائے۔

حکومتِ پاکستان نے اپنے پیغام میں کہا کہ پاکستان اس دکھ کی گھڑی میں قطر کی حکومت، شاہی خاندان اور عوام کے ساتھ کھڑا ہے اور مرحوم شیخ حمد بن خلیفہ آل ثانی کی خطے کے امن، استحکام اور قطر کی ترقی کے لیے خدمات کو ہمیشہ یاد رکھا جائے گا۔