ٹرمپ کا بڑا دعویٰ، پاکستانی شخصیات کی درخواست پر ایران پر فیصلہ کن حملہ روکا گیا

(واشنگٹن ڈی سی ) امریکی ٹی وی کو انٹرویو دیتے ہوئے صدر ڈونلڈ ٹرمپ نے کہا کہ پاکستان کے “بہت اچھے لوگوں” نے انہیں ایران کے خلاف کارروائی روکنے کیلئے کہا۔ ان کے بقول وہ شخصیات ایران کے بہت قریب ہیں اور انہوں نے کہا کہ “کیا آپ رک سکتے ہیں، ہم ڈیل کرا دیں گے۔”

ٹرمپ نے ایران کے ساتھ مذاکرات پر بھی مایوسی کا اظہار کرتے ہوئے کہا کہ “ہر بار جب وہ ڈیل کرتے ہیں تو اگلے روز ایسا لگتا ہے کہ ہماری کوئی بات چیت ہی نہیں ہوئی۔ ان کے ساتھ کچھ مسئلہ ہے، اصل میں وہ پاگل ہیں۔”

دوسری جانب چین سے واپسی پر صدارتی طیارے ائیرفورس ون میں میڈیا سے گفتگو کرتے ہوئے ٹرمپ نے کہا کہ وہ جنگ بندی کے حق میں نہیں تھے، تاہم دیگر ممالک کے اصرار پر جنگ بندی پر آمادہ ہوئے۔ انہوں نے کہا کہ یہ جنگ بندی “پاکستان پر ایک نوازش” تھی۔

صدر ٹرمپ نے ایک بار پھر وزیراعظم شہباز شریف اور فیلڈ مارشل عاصم منیر کی تعریف کرتے ہوئے دونوں کو “شاندار شخصیات” قرار دیا۔

سیاسی مبصرین کے مطابق ٹرمپ کے یہ بیانات خطے میں جاری سفارتی سرگرمیوں اور ایران سے متعلق عالمی کشیدگی کے تناظر میں اہم سمجھے جا رہے ہیں۔