سہیل آفریدی کا چارسدہ میں آئندہ کے لائحہ عمل کا اعلان، پہلے ٹیسٹ پھر ٹی ٹوئنٹی اور آخر میں ٹی ٹین کھیلنے کا عندیہ

پشاور: وزیراعلیٰ خیبرپختونخوا سہیل آفریدی نے کہا ہے کہ وہ آج چارسدہ میں آئندہ کے لائحہ عمل کا اعلان کریں گے، پہلے ٹیسٹ میچ، پھر ٹی ٹوئنٹی اور آخر میں ٹی ٹین کھیلیں گے۔ انہوں نے واضح کیا کہ ان کی سیاسی جدوجہد بلاول بھٹو زرداری اور مریم نواز کے لانگ مارچ جیسی نہیں ہے۔

بھانہ ماڑی میں کارکنوں سے خطاب کرتے ہوئے سہیل آفریدی کا کہنا تھا کہ ان کی جماعت آئین و قانون کے دائرے میں رہتے ہوئے اپنی سیاسی اور جمہوری جدوجہد جاری رکھے گی۔

انہوں نے کہا کہ ہم نے اپنے سات مطالبات پیش کیے ہیں، اگر کوئی ایک مطالبہ بھی غیر قانونی ثابت کردیا جائے تو سامنے لایا جائے۔ ان کے مطابق ان کی جماعت ایک سیاسی اور جمہوری قوت ہے اور جدوجہد آئین و قانون کے مطابق ہی کی جائے گی۔

وزیراعلیٰ خیبرپختونخوا نے صوبائی حکومت کی کارکردگی پر تنقید کرنے والوں کو بھی تنقید کا نشانہ بنایا۔ ان کا کہنا تھا کہ حکومت کی کارکردگی پر سوالات اٹھانے والے بوکھلاہٹ کا شکار ہیں۔

سہیل آفریدی نے دعویٰ کیا کہ خیبرپختونخوا کو ڈیجیٹل گورننس ایوارڈ ملا ہے، جبکہ صوبائی اسمبلی نے دنیا بھر میں پہلی پوزیشن حاصل کی ہے۔

ماضی کے لانگ مارچز کا حوالہ دیتے ہوئے وزیراعلیٰ نے کہا کہ جب ان کی جماعت کی حکومت تھی تو لانگ مارچ کرنے والے فکس میچ کے ساتھ آتے تھے، تاہم ان کے بقول اس مرتبہ کوئی فکس میچ نہیں ہے۔

انہوں نے چارسدہ میں آئندہ کے لائحہ عمل کے اعلان کا عندیہ دیتے ہوئے اپنی سیاسی جدوجہد کے مختلف مراحل کو کرکٹ کی اصطلاحات میں بیان کیا اور کہا کہ پہلے ٹیسٹ میچ، پھر ٹی ٹوئنٹی اور آخر میں ٹی ٹین کھیلا جائے گا۔