صدر ٹرمپ تین روزہ دورے پر بیجنگ پہنچ گئے، شی جن پنگ سے اہم ملاقات متوقع

(بیجنگ ) امریکی میڈیا کے مطابق بیجنگ پہنچنے پر چینی نائب صدر  ہان ژینگ نے امریکی صدر کا استقبال کیا۔ اس موقع پر چین میں امریکی سفیر، امریکا میں چینی سفیر  اور چین کے ایگزیکٹو نائب وزیرخارجہ ما ژاؤشو  بھی موجود تھے۔

امریکی صدر کے استقبال کے لیے 300 چینی نوجوان بھی موجود تھے، جو نیلے اور سفید رنگ کے لباس  میں ملبوس تھے اور  انہوں نے ہاتھوں میں چینی پرچم اٹھا رکھے تھے۔چینی میڈیا کے مطابق اپنے دورے میں امریکی صدر چین کے صدر شی جن پنگ سے ملاقات کریں گے۔

جس میں امریکا اور چین کے درمیان تجارتی جنگ، عالمی معیشت اور خطے کی صورتحال پر تفصیلی تبادلہ خیال کیا جائے گا۔

یہ دورہ اس حوالے سے بھی اہم قرار دیا جا رہا ہے کہ صدر ٹرمپ نے آخری بار 2017 میں چین کا دورہ کیا تھا۔

چین روانگی سے قبل واشنگٹن میں میڈیا سے گفتگو کرتے ہوئے ٹرمپ نے کہا کہ دورۂ چین کے دوران وہ ایران جنگ اور مشرق وسطیٰ کی صورتحال پر بھی چینی صدر سے گفتگو کریں گے، تاہم ایران کے معاملے پر امریکا کو چین کی مدد کی ضرورت نہیں۔

انہوں نے پاکستان کے کردار کو سراہتے ہوئے کہا کہ پاکستان نے مذاکراتی عمل میں شاندار کردار ادا کیا، جبکہ شہباز شریف اور سید عاصم منیر کو بھی بہترین شخصیات قرار دیا۔

ٹرمپ کا کہنا تھا کہ پاکستان کی ثالثی کی کوششیں قابل تعریف ہیں اور خطے میں کشیدگی کم کرنے کیلئے اہم کردار ادا کر رہی ہیں۔