ایران کے حوالے سے مثبت پیشرفت، جنگ جلد ختم کردیں گے: ٹرمپ کا بڑا اعلان

(واشنگٹن) امریکی صدر ڈونلڈ ٹرمپ نے ایران کے حوالے سے اہم بیان دیتے ہوئے کہا ہے کہ مثبت پیشرفت ہوئی ہے اور امریکا ایران جنگ کو تیزی سے ختم کردے گا۔

میڈیا سے گفتگو کرتے ہوئے صدر ٹرمپ نے کہا کہ ایران کو کسی صورت ایٹمی ہتھیار رکھنے کی اجازت نہیں دی جاسکتی۔ ان کا کہنا تھا کہ ایران کی نیوی، فضائیہ، فوج اور قیادت کو شدید نقصان پہنچایا جاچکا ہے۔

صدر ٹرمپ نے اس بات کا بھی اعادہ کیا کہ اگر ایران نے جوہری ہتھیار حاصل کیے تو وہ سب سے پہلے اسرائیل کو نشانہ بنا سکتا ہے، اسی لیے امریکا ایران کو ایٹمی طاقت بننے سے روکنے کے لیے ہر ممکن اقدام کرے گا۔

اس سے قبل وائٹ ہاؤس کے بال روم کی تعمیری سائٹ کے دورے کے دوران میڈیا سے گفتگو میں امریکی صدر نے ایران پر مزید حملوں کا عندیہ دیا تھا۔ انہوں نے خبردار کیا تھا کہ امریکا کو ایران پر دوبارہ حملہ کرنا پڑ سکتا ہے۔

ٹرمپ کے مطابق آئندہ 2 سے 3 روز میں، ممکنہ طور پر جمعے یا ہفتے کو، یا پھر اگلے ہفتے کے آغاز میں ایران کے خلاف نئی کارروائی کی جاسکتی ہے۔

امریکی صدر نے کہا کہ وقت محدود ہے اور ایران کو ایک بڑا دھچکا دینا ضروری ہوگا تاکہ خطے میں امن و استحکام کو یقینی بنایا جاسکے۔