جاپان میں 7.1 شدت کا زلزلہ، سونامی وارننگ جاری، میکسیکو میں بھی زلزلے کے جھٹکے

ٹوکیو: جاپان کے جنوبی جزیرے کیوشو میں 7.1 شدت کے طاقتور زلزلے کے جھٹکے محسوس کیے گئے، جس کے بعد حکام نے احتیاطی طور پر سونامی وارننگ جاری کر دی۔

جاپان کی موسمیاتی ایجنسی کے مطابق زلزلے کے بعد ساحلی علاقوں کے لیے تقریباً ایک میٹر بلند سونامی کی وارننگ جاری کی گئی ہے۔ متعلقہ اداروں نے شہریوں کو ساحلی علاقوں سے دور رہنے اور حفاظتی ہدایات پر عمل کرنے کی تلقین کی ہے۔

دوسری جانب میکسیکو میں بھی زلزلے کے شدید جھٹکے محسوس کیے گئے۔ ابتدائی رپورٹس کے مطابق ریکٹر اسکیل پر زلزلے کی شدت 5.8 ریکارڈ کی گئی۔

مقامی حکام کا کہنا ہے کہ میکسیکو میں آنے والے زلزلے کے نتیجے میں تاحال کسی جانی یا مالی نقصان کی اطلاع موصول نہیں ہوئی، جبکہ صورتحال پر مسلسل نظر رکھی جا رہی ہے۔