امریکی سینٹرل کمانڈ کا ایران پر طاقتور حملوں کا اعلان، آبنائے ہرمز کے واقعے کو وجہ قرار دے دیا

واشنگٹن: امریکی سینٹرل کمانڈ (سینٹ کام) نے اعلان کیا ہے کہ ایران کے خلاف طاقتور فوجی حملوں کا سلسلہ شروع کر دیا گیا ہے۔ امریکی حکام کے مطابق یہ کارروائیاں آبنائے ہرمز میں تجارتی جہازوں پر ہونے والے مبینہ حملوں کے ردعمل میں کی جا رہی ہیں۔

سینٹ کام نے سوشل میڈیا پلیٹ فارم ایکس پر جاری اپنے بیان میں کہا کہ ایران کے خلاف کارروائی کا مقصد بین الاقوامی آبی گزرگاہ میں معصوم شہریوں کو لے جانے والے تجارتی جہازوں کو نشانہ بنانے کی بھاری قیمت وصول کرنا ہے۔

بیان کے مطابق امریکی حملے آبنائے ہرمز سے گزرنے والے تین تجارتی جہازوں پر ایران کے مبینہ حملوں کے جواب میں کیے جا رہے ہیں۔

امریکی سینٹرل کمانڈ نے مزید دعویٰ کیا کہ ایران کی مبینہ جارحیت بلاجواز، خطرناک اور جنگ بندی کی واضح خلاف ورزی تھی، جس کے باعث امریکہ نے فوجی کارروائی کا فیصلہ کیا۔

سینٹ کام کا کہنا ہے کہ امریکی افواج صورتحال پر مسلسل نظر رکھے ہوئے ہیں اور بین الاقوامی بحری راستوں کے تحفظ اور تجارتی جہازوں کی سلامتی کو یقینی بنانے کے لیے ضروری اقدامات جاری رکھے جائیں گے۔

دوسری جانب ایران کی جانب سے اس امریکی بیان پر فوری طور پر کوئی باضابطہ ردعمل سامنے نہیں آیا۔ تاہم خطے میں بڑھتی ہوئی کشیدگی کے باعث عالمی برادری صورتحال پر گہری نظر رکھے ہوئے ہے۔