صدر ٹرمپ کا امریکی افواج کو ایران پر ایک روز کیلئے حملے روکنے کا حکم، سفارت کاری کو ایک اور موقع

واشنگٹن: امریکی صدر ڈونلڈ ٹرمپ نے امریکی افواج کو ایران پر ایک روز کے لیے حملے روکنے کی ہدایت جاری کر دی ہے تاکہ سفارتی کوششوں کو مزید موقع دیا جا سکے۔

امریکی ویب سائٹ کی رپورٹ کے مطابق صدر ٹرمپ نے جمعے کے روز امریکی فوج کو ایران کے خلاف نئے حملے نہ کرنے کا حکم دیا، جس کے بعد تقریباً دو ہفتوں سے جاری روزانہ فوجی کارروائیوں کا سلسلہ عارضی طور پر رک گیا۔

رپورٹ میں کہا گیا ہے کہ اگر صدر ٹرمپ دوبارہ فوجی کارروائی کی منظوری دیتے ہیں تو امریکی افواج مختصر نوٹس پر حملے دوبارہ شروع کرنے کی مکمل صلاحیت رکھتی ہیں۔

ذرائع کے مطابق اسی دوران ایک عمانی وفد آبنائے ہرمز کو دوبارہ کھولنے کے لیے نئے انتظامات پر بات چیت کرنے تہران پہنچا، جہاں ایرانی حکام کے ساتھ مذاکرات میں پیشرفت ہوئی ہے۔

رپورٹ کے مطابق امکان ظاہر کیا جا رہا ہے کہ عمان اور ایران کے درمیان ہفتے کے اختتام تک ایک معاہدہ طے پا سکتا ہے، جس سے خطے میں کشیدگی کم ہونے اور بحری تجارت کی بحالی کی راہ ہموار ہونے کی امید ہے۔