امریکا نے ایران پر حملوں کا نیا مرحلہ شروع کر دیا، سینٹکام کی تصدیق

واشنگٹن: امریکی فوج نے ایران کے خلاف فوجی کارروائیوں کا نیا مرحلہ شروع کر دیا ہے۔ امریکی سینٹرل کمانڈ (سینٹکام) نے اپنے سرکاری بیان میں تصدیق کی ہے کہ امریکی افواج نے صدر کی ہدایت پر ایران کے خلاف تازہ حملے کیے ہیں۔

سینٹکام کے مطابق ان کارروائیوں کا مقصد آبنائے ہرمز میں تجارتی جہازوں پر حملوں کے لیے استعمال ہونے والی ایرانی فوجی صلاحیتوں کو کمزور کرنا ہے، تاکہ بین الاقوامی بحری راستوں کی سلامتی اور عالمی تجارتی نقل و حمل کو محفوظ بنایا جا سکے۔

بیان میں کہا گیا ہے کہ امریکی افواج خطے میں بحری سلامتی برقرار رکھنے اور عالمی تجارت کو درپیش خطرات کا مقابلہ کرنے کے لیے ضروری اقدامات جاری رکھیں گی۔

دوسری جانب ایرانی میڈیا کے مطابق جنوبی ایران کے شہر سیریک کے قریب اور بندر عباس میں متعدد دھماکوں کی آوازیں سنی گئی ہیں۔ تاہم ایرانی حکام نے فوری طور پر ان دھماکوں کی نوعیت، نقصانات یا جانی نقصان سے متعلق کوئی باضابطہ تفصیلات جاری نہیں کیں۔

دفاعی ماہرین کے مطابق امریکا اور ایران کے درمیان بڑھتی ہوئی فوجی کشیدگی سے نہ صرف مشرقِ وسطیٰ بلکہ عالمی توانائی کی ترسیل، تیل کی منڈیوں اور بین الاقوامی سمندری تجارت پر بھی نمایاں اثرات مرتب ہو سکتے ہیں۔