امریکا جلد ایران سے نکل جائے گا، تیل کی قیمتیں گرنے والی ہیں: ٹرمپ

ٹیکساس: امریکی صدر ڈونلڈ ٹرمپ نے کہا ہے کہ امریکا جلد ایران سے نکل جائے گا اور تیل کی قیمتیں چٹان کی طرح گرنے والی ہیں۔

ٹیکساس میں انتخابی ریلی سے خطاب کرتے ہوئے امریکی صدر نے ایران کے جوہری پروگرام سے متعلق اپنے مؤقف کو دہراتے ہوئے کہا کہ امریکا ایران کو کسی صورت جوہری ہتھیار حاصل کرنے کی اجازت نہیں دے گا۔

ڈونلڈ ٹرمپ نے کہا کہ وہ ایران کے ساتھ ممکنہ معاہدے کے خواہاں ہیں، تاہم اصل سوال یہ ہے کہ آیا تہران اپنے جوہری پروگرام کو روکنے کے لیے قابلِ قبول اقدامات کرنے پر آمادہ ہے یا نہیں۔

امریکی صدر کا کہنا تھا کہ وہ ایران کے ساتھ معاہدہ کرنا چاہتے ہیں، لیکن یہ دیکھنا ہوگا کہ ایران اپنے جوہری پروگرام کو روکنے کے لیے کیا پیش کرنے کو تیار ہے۔

ٹرمپ نے مزید کہا کہ امریکا ایران کو کبھی بھی جوہری ہتھیار رکھنے کی اجازت نہیں دے گا۔

امریکی صدر نے گزشتہ دنوں لاس اینجلس اور سان ڈیاگو پر مبینہ ایرانی حملے سے متعلق اپنے بیانات کا بھی اعادہ کیا۔ ان کا کہنا تھا کہ اگر ایسے حملے ہوئے تو امریکا سخت ردعمل دے گا اور اپنے ملک کے دفاع کو یقینی بنائے گا۔

ٹرمپ کا گزشتہ ایک ماہ کے دوران ٹیکساس کا یہ تیسرا دورہ تھا، جہاں وہ ریپبلکن امیدواروں کی انتخابی مہم میں سرگرم ہیں۔ وسط مدتی انتخابات کے تناظر میں ریپبلکن پارٹی کو کانگریس میں اپنی اکثریت برقرار رکھنے کے لیے سخت مقابلے کا سامنا ہے۔