ایران مذاکرات کیلئے تیار مگر امریکا پر اعتماد نہیں — باقر قالیباف کی اسلام آباد میں اہم گفتگو

(اسلام آباد) میں گفتگو کرتے ہوئے باقر قالیباف نے کہا کہ اگر امریکا حقیقی اور قابل عمل معاہدہ پیش کرے اور ایران کے حقوق کو تسلیم کرے تو ایران مذاکرات کیلئے تیار ہے۔ انہوں نے واضح کیا کہ ایران ہمیشہ سفارتکاری اور مذاکرات کو ترجیح دیتا ہے لیکن امریکا کو عملی اقدامات کرنا ہوں گے۔

ایرانی پارلیمنٹ اسپیکر نے کہا کہ امریکا ایران مذاکرات سے قبل چند نکات طے کیے گئے تھے جن پر ابھی تک عمل درآمد نہیں ہوا۔ انہوں نے لبنان میں جنگ بندی اور ایران کے منجمد اثاثوں کی بحالی کو اہم شرائط قرار دیتے ہوئے کہا کہ ان نکات پر پیش رفت ضروری ہے۔

دوسری جانب ایرانی وزیر خارجہ عباس عراقچی نے بھی امریکا پر زور دیا کہ وہ اپنے وعدوں کی پاسداری کرے۔ انہوں نے کہا کہ امریکا نے لبنان میں جنگ بندی کا وعدہ کیا تھا جس پر عمل ہونا ابھی باقی ہے۔

سفارتی ذرائع کے مطابق اسلام آباد میں جاری ملاقاتوں کو خطے میں کشیدگی کم کرنے کے لیے اہم پیش رفت قرار دیا جا رہا ہے۔ ماہرین کا کہنا ہے کہ اگر فریقین کے درمیان اعتماد سازی کے اقدامات کیے گئے تو ایران امریکا مذاکرات میں اہم پیش رفت ممکن ہے۔

سیاسی مبصرین کے مطابق اسلام آباد میں جاری سفارتی سرگرمیاں خطے کی صورتحال پر گہرے اثرات مرتب کر سکتی ہیں اور آئندہ چند دنوں میں مزید اہم اعلانات متوقع ہیں۔