تیل کی قیمتیں نمایاں کم ہوں گی، امریکی وزیر خزانہ اسکاٹ بیسنٹ کی پیشگوئی

(واشنگٹن)امریکی وزیر خزانہ اسکاٹ بیسنٹ نے تیل کی قیمتوں میں نمایاں کمی کی پیشگوئی کرتے ہوئے کہا ہے کہ جنگ کے بعد عالمی توانائی کی قیمتیں کم سطح پر آ جانی چاہئیں۔

ایک امریکی ٹی وی چینل کو انٹرویو دیتے ہوئے اسکاٹ بیسنٹ کا کہنا تھا کہ امریکا کی توانائی برآمدات اس وقت بلند سطح پر ہیں اور ملک عالمی توانائی منڈی میں ایک بڑے فاتح کے طور پر ابھر رہا ہے۔

انہوں نے کہا کہ امریکی توانائی برآمدات میں اضافے کی راہ میں بنیادی رکاوٹ صرف انفراسٹرکچر کی کمی ہے، بصورت دیگر امریکا اپنی پیداوار اور سپلائی کے ذریعے عالمی مارکیٹ پر مزید اثر انداز ہو سکتا ہے۔

امریکی وزیر خزانہ کے مطابق آبنائے ہرمز سے جہازوں کی آمدورفت میں اضافہ متوقع ہے اور اگر مزید جہاز گزرتے نظر آئیں تو یہ حیران کن نہیں ہوگا۔ انہوں نے کہا کہ ایران کی جانب سے جہازوں سے ٹول وصول کرنے کی کوششوں سے خاطر خواہ فائدہ حاصل نہیں ہو رہا۔

انہوں نے مزید کہا کہ امریکی صدر ڈونلڈ ٹرمپ اور چین کے صدر کے درمیان آئندہ ملاقات میں کسی بڑی پالیسی تبدیلی کا امکان نہیں ہے۔

ماہرین کے مطابق اگر امریکی توانائی برآمدات میں مزید اضافہ ہوا اور خطے میں کشیدگی کم ہوئی تو عالمی سطح پر تیل کی قیمتوں میں واقعی نمایاں کمی دیکھنے میں آ سکتی ہے۔