ایران کے ساتھ جنگ نئے مرحلے میں داخل ہوچکی: جے ڈی وینس

واشنگٹن: امریکی نائب صدر جے ڈی وینس نے کہا ہے کہ ایران کے ساتھ جنگ اب ایک نئے مرحلے میں داخل ہوچکی ہے، جبکہ تہران پر معاشی دباؤ امریکا کا مؤثر ترین ہتھیار بن گیا ہے۔

جے ڈی وینس کے مطابق امریکا نے ایران کی فوجی اور جوہری صلاحیت کو نقصان پہنچایا ہے اور آبنائے ہرمز کے ذریعے تیل و گیس کی ترسیل جاری رکھنے میں بھی کامیابی حاصل کی ہے۔

امریکی نائب صدر نے کہا کہ ایران کی معیشت پر دباؤ مسلسل بڑھ رہا ہے اور اب تہران کو فیصلہ کرنا ہوگا کہ وہ اپنی معیشت کو مزید مشکلات کا شکار دیکھنا چاہتا ہے یا مغربی ممالک کے ساتھ تعلقات بہتر بنانے کی راہ اختیار کرتا ہے۔

انہوں نے کہا کہ امریکا کی پالیسی کا بنیادی مقصد ایران کو اپنی جوہری صلاحیت دوبارہ بحال کرنے سے روکنا ہے۔ جے ڈی وینس کے مطابق ایران کے خلاف فوجی اقدامات کے ساتھ ساتھ معاشی دباؤ بھی جاری رکھا جائے گا۔

امریکی نائب صدر کا کہنا تھا کہ ایران کو اپنے مستقبل کے حوالے سے اہم فیصلے کرنا ہوں گے، جبکہ امریکا تہران پر دباؤ برقرار رکھتے ہوئے اپنے مقاصد کے حصول کے لیے اقدامات جاری رکھے گا۔