کینیڈا میں پاکستانی نژاد ذیشان واہلہ برٹش کولمبیا وزیر مملکت برائے ہاؤسنگ مقرر
قرةالعَین حیدر21 نومبر، 2026
کینیڈا کے صوبے برٹش کولمبیا کی نئی کابینہ کا اعلان، پاکستانی نژاد کینیڈین ذیشان واہلہ کو وزیر مملکت برائے ہاؤسنگ مقرر کردیا گیا
اوٹاوا: کینیڈا کے صوبے برٹش کولمبیا کی نئی صوبائی کابینہ میں پاکستانی نژاد کینیڈین ذیشان واہلہ کو اہم ذمہ داری سونپ دی گئی ہے۔ انہیں وزیر مملکت برائے ہاؤسنگ مقرر کیا گیا ہے۔
تفصیلات کے مطابق برٹش کولمبیا کے نئے وزیرِ اعلیٰ لورن ڈورکسن نے اپنی نئی کابینہ کا اعلان کردیا ہے، جس میں پاکستانی نژاد ذیشان واہلہ بھی شامل ہیں۔ ان کی تقرری کو کینیڈا میں مقیم پاکستانی کمیونٹی کے لیے اہم پیش رفت قرار دیا جا رہا ہے۔
لورن ڈورکسن نے صوبے کے 38ویں وزیرِ اعلیٰ کی حیثیت سے اپنے عہدے کا حلف اٹھایا۔ اس موقع پر نئی صوبائی کابینہ کی حلف برداری کی تقریب وکٹوریہ کے گورنمنٹ ہاؤس میں منعقد ہوئی۔
واضح رہے کہ 24 اکتوبر 2026 کو ہونے والے انتخابات میں کنزرویٹو پارٹی نے اکثریت حاصل کی تھی، جس کے بعد صوبے میں نئی حکومت تشکیل دی گئی۔
ذیشان واہلہ کی بطور وزیر مملکت برائے ہاؤسنگ تقرری سے انہیں صوبے میں رہائشی امور سے متعلق حکومتی ذمہ داریاں ادا کرنے کا موقع ملے گا۔ ان کی کابینہ میں شمولیت کینیڈا میں پاکستانی نژاد افراد کی سیاسی نمائندگی کے حوالے سے بھی قابل ذکر پیش رفت ہے۔

قرةالعَین حیدر, وائسز آف امریکا کیلئے کینیڈا میں بطور نمائندہ خصوصی کے فرائض انجام دے رہی ہیں
شائع ہوا: 21 نومبر، 2026 کو 06:01 AM
آخری تدوین: 21 نومبر، 2026



