سمندری دفاع مضبوط، پاک بحریہ میں جدید ملجم کلاس پی این ایس خیبر کی شمولیت

(راولپنڈی) پاک فوج کے شعبہ تعلقات عامہ (آئی ایس پی آر) کے مطابق پی این ایس خیبر کی شمولیت کی پروقار تقریب منعقد ہوئی جس میں چیف آف دی نیول اسٹاف ایڈمرل نوید اشرف نے بطور مہمانِ خصوصی شرکت کی۔

آئی ایس پی آر کے مطابق پی این ایس خیبر جدید ترین ٹیکنالوجیز اور جدید پلیٹ فارمز سے لیس ہے، جو دشمن کے اہم انفراسٹرکچر اور بحری اثاثوں کو نشانہ بنانے کی بھرپور صلاحیت رکھتا ہے۔

اس موقع پر نیول چیف ایڈمرل نوید اشرف نے کہا کہ پاکستان دنیا کے اہم توانائی کے بحری راستوں پر واقع ہے، جہاں بحری سکیورٹی اولین ترجیح ہے۔ انہوں نے کہا کہ قومی مفادات کے تحفظ اور تجارتی بحری راستوں کی حفاظت کیلئے مضبوط بحری قوت ناگزیر ہے۔

نیول چیف نے کہا کہ معرکۂ حق کے دوران پاک بحریہ بھارتی طیارہ بردار جہاز وکرانت کو غرق کرنے کیلئے مکمل طور پر تیار تھی۔ انہوں نے واضح کیا کہ پاکستان کے بحری مفادات کو چیلنج کرنے کی کسی بھی کوشش کا بھرپور جواب دیا جائے گا۔

انہوں نے مزید کہا کہ پی این ایس خیبر اور مستقبل میں شامل ہونے والی ہنگور کلاس آبدوزیں پاکستان کے بحری دفاع کو مزید مضبوط بنائیں گی اور ملک کیلئے دفاعی دیوار ثابت ہوں گی۔

نیول چیف نے سمندری حدود کے دفاع اور خودمختار بحری سلامتی کے لیے پاک بحریہ کے عزم کا اعادہ بھی کیا۔