عالمی ادارہ صحت کا پاکستان پر پولیو سے متعلق سفری پابندیاں قائم رکھنے کا اعلان
عالمی ادارہ صحت (ڈبلیو ایچ او) نے پاکستان پر پولیو وائرس کے باعث عائد مشروط عالمی سفری پابندیوں میں مزید تین ماہ کی توسیع کر دی ہے۔ یہ فیصلہ ڈبلیو ایچ او کی ایمرجنسی پولیو کمیٹی کے 44ویں اجلاس میں کیا گیا۔
اعلامیے کے مطابق پاکستان اور افغانستان بدستور وائلڈ پولیو وائرس کے عالمی پھیلاؤ کے لیے خطرہ قرار دیے گئے ہیں اور دونوں ممالک کے درمیان آمدورفت وائرس کی منتقلی کا اہم ذریعہ ہے۔
ڈبلیو ایچ او کے مطابق گزشتہ سال پاکستان میں پولیو کے 31 کیسز رپورٹ ہوئے جبکہ ملک بھر سے 608 سیوریج نمونوں میں وائرس پایا گیا۔ جنوبی خیبرپختونخوا اور کوئٹہ بلاک کو اب بھی حساس علاقے قرار دیا گیا ہے جبکہ خیبرپختونخوا میں تقریباً ڈھائی لاکھ بچے پولیو ویکسین سے محروم ہیں۔
عالمی ادارہ صحت نے پاکستان میں انسداد پولیو مہمات کے معیار اور حکومتی اقدامات کو سراہتے ہوئے کہا کہ پولیو کے خاتمے کے لیے پاکستان اور افغانستان کو مشترکہ اور مؤثر اقدامات جاری رکھنا ہوں گے۔
ڈبلیو ایچ او کے مطابق پاکستان سے بیرون ملک سفر کرنے والوں کے لیے پولیو ویکسینیشن لازمی رہے گی اور تین ماہ بعد صورتحال کا دوبارہ جائزہ لیا جائے گا۔
Web Desk
Media Channel
شائع ہوا: 10 مارچ، 2026 کو 01:41 PM
آخری تدوین: 25 مارچ، 2026
