دشمن نے 4 گھنٹے میں جنگ بندی کی درخواست کی، معرکہ حق میں شاہینوں کا غلبہ تھا: وزیراعظم شہباز شریف

وفاقی دارالحکومت اسلام آباد میں پاکستان مونومنٹ پر معرکہ حق میں شاندار فتح کے ایک سال مکمل ہونے پر منعقدہ تقریب سے خطاب کرتے ہوئے وزیراعظم نے کہا کہ اللہ تعالیٰ نے معرکہ حق کو عظیم فتح میں تبدیل کیا اور شہداء نے اپنے مقدس خون سے وطن کی دھرتی کو سینچا۔

شہباز شریف نے کہا کہ بھارت نے پہلگام واقعے کو جواز بنا کر پاکستان پر بے بنیاد الزامات عائد کیے، تاہم پاکستان نے صبر اور تحمل کا دامن ہاتھ سے نہیں چھوڑا۔ انہوں نے کہا کہ کاکول اکیڈمی میں دشمن کو اس کے انجام سے خبردار کیا گیا تھا اور پاکستان نے پہلگام واقعے کی شفاف تحقیقات کی بھی پیشکش کی تھی۔

وزیراعظم کا کہنا تھا کہ دشمن نے بلااشتعال جنگ مسلط کرتے ہوئے مساجد اور معصوم بچوں کو نشانہ بنایا، تاہم پاک افواج نے دشمن کے حملے کا بھرپور اور تاریخی جواب دیا۔ انہوں نے کہا کہ “ہمارے شاہین دشمن پر جھپٹے تو دشمن کو جان کے لالے پڑگئے، ہر طرف ہمارے شاہینوں کا غلبہ تھا اور ہر جانب دشمن کے طیاروں کا ملبہ تھا۔”

شہباز شریف نے انکشاف کیا کہ دشمن نے صرف چار گھنٹوں میں جنگ بندی کی درخواست کردی جبکہ امریکی صدر ڈونلڈ ٹرمپ نے فوری کردار ادا کرتے ہوئے جنگ بندی کروائی۔

وزیراعظم نے فیلڈ مارشل عاصم منیر، ایئر چیف مارشل، پاک بحریہ کے سربراہ اور تینوں افواج کے افسران و جوانوں کو خراج تحسین پیش کرتے ہوئے کہا کہ تاریخ فیلڈ مارشل کی دانشمندانہ اور دلیرانہ قیادت کو سنہری حروف میں یاد رکھے گی۔

انہوں نے کہا کہ پاک فضائیہ کے شاہینوں نے دشمن کے جہازوں کے پرخچے اڑا دیے جبکہ پاک بحریہ نے ایسی ہیبت طاری کی کہ دشمن سمندری حدود میں داخل ہونے کی جرات نہ کرسکا۔

تقریب کے دوران وزیراعظم نے 10 مئی کو “یوم معرکہ حق” کے طور پر منانے کا اعلان کرتے ہوئے کہا کہ ہر سال یہ دن قومی جذبے اور جوش و خروش سے منایا جائے گا۔

شہباز شریف نے چین، ترکیہ اور سعودی عرب کی قیادت کا شکریہ ادا کرتے ہوئے کہا کہ چین نے پاکستان کی بھرپور حمایت کرکے دوستی کا حق ادا کیا۔

تقریب میں صدر مملکت آصف علی زرداری، فیلڈ مارشل عاصم منیر، اسپیکر قومی اسمبلی سردار ایاز صادق، چیئرمین سینیٹ یوسف رضا گیلانی، وفاقی وزرا، عسکری حکام اور غیر ملکی سفارتکاروں نے بھی شرکت کی۔ تقریب کا آغاز قومی ترانے سے ہوا جبکہ تینوں مسلح افواج کے دستوں نے مارچ پاسٹ اور سلامی پیش کی۔