امریکہ محفوظ رہنا چاہتا ہے تو ہمارے خطے سے نکل جائے، عباس عراقچی

(تہران) ایرانی وزیر خارجہ عباس عراقچی نے امریکہ کو سخت پیغام دیتے ہوئے کہا ہے کہ اگر امریکہ محفوظ رہنا چاہتا ہے تو اسے خطے سے اپنی فوجی موجودگی ختم کرنا ہوگی۔ ان کا کہنا تھا کہ ایران اپنی خودمختاری اور قومی سلامتی کے تحفظ کے لیے ہر ممکن اقدام کرنے کی صلاحیت رکھتا ہے اور کسی بھی حملے کا بھرپور جواب دیا جائے گا۔

سماجی رابطے کی ویب سائٹ ایکس پر جاری اپنے بیان میں عباس عراقچی نے کہا کہ امریکہ نے میدانِ جنگ میں ناکامیوں کے باوجود ایران کی قوتِ ارادی کو آزمانے کا فیصلہ کیا ہے، تاہم ایرانی مسلح افواج کسی بھی حملے یا دھمکی کا جواب دیے بغیر نہیں رہیں گی۔

انہوں نے مزید کہا کہ خطے میں موجود غیر ملکی افواج مسلسل خطرات سے دوچار رہتی ہیں کیونکہ انسانی غلطی، حادثات یا ممکنہ کراس فائر کی صورت میں کشیدگی میں خطرناک حد تک اضافہ ہوسکتا ہے۔ ان کے مطابق خطے میں امن و استحکام قائم کرنے کا سب سے مؤثر طریقہ غیر ملکی فوجوں کا انخلا ہے۔

عباس عراقچی نے واضح کیا کہ ایران سفارت کاری اور مذاکرات کو ترجیح دیتا ہے، لیکن اگر ضرورت پیش آئی تو ملک اپنے دفاع کے لیے دیگر تمام آپشنز بھی استعمال کرنے کی صلاحیت رکھتا ہے۔ انہوں نے کہا کہ ایرانی مسلح افواج ماضی کی طرح آئندہ بھی ہر قسم کی جارحیت کا مؤثر جواب دینے کے لیے مکمل طور پر تیار ہیں۔

ایرانی وزیر خارجہ نے آبنائے ہرمز کے حوالے سے کہا کہ یہ بین الاقوامی پانی نہیں بلکہ ایران اور عمان کے درمیان واقع ایک مشترکہ آبی گزرگاہ ہے، جس کی بحری حدود واضح طور پر متعین ہیں۔ ان کا کہنا تھا کہ ایران کی فضائی، بحری اور زمینی افواج ہر قسم کی خلاف ورزی پر ہائی الرٹ ہیں اور ملکی خودمختاری کے دفاع کے لیے مکمل تیاری رکھتی ہیں۔

انہوں نے اس بات پر بھی زور دیا کہ خطے میں غیر ملکی فوجی موجودگی خطرات اور کشیدگی میں اضافے کا باعث بن سکتی ہے، اس لیے علاقائی امن، استحکام اور سلامتی کے لیے ان افواج کا جلد از جلد انخلا ناگزیر ہے۔