عمان سے جاری مذاکرات حتمی مرحلے میں داخل، ایران کی تصدیق

تہران :ایران کے وزیر خارجہ عباس عراقچی نے کہا ہے کہ آبنائے ہرمز سے متعلق ایران اور عمان کے درمیان جاری مذاکرات اپنے آخری مرحلے میں داخل ہو چکے ہیں اور دونوں ممالک معاہدے کو حتمی شکل دینے کے قریب ہیں۔

تہران میں کابینہ اجلاس کے موقع پر میڈیا سے گفتگو کرتے ہوئے عباس عراقچی نے کہا کہ ایران اور عمان کے درمیان ہونے والی بات چیت مثبت سمت میں آگے بڑھ رہی ہے اور اس دوران اہم پیش رفت سامنے آئی ہے۔

انہوں نے کہا کہ دونوں ممالک مذاکرات کے ذریعے قابل قبول حل تک پہنچنے کے لیے مسلسل رابطے میں ہیں اور فریقین معاہدے کو جلد حتمی شکل دینے کی کوشش کر رہے ہیں۔

ایرانی وزیر خارجہ کے مطابق عمان نے اس عمل میں ثالث اور سہولت کار کا کردار ادا کیا ہے، جبکہ دونوں ممالک کے درمیان ہونے والی گفتگو تعمیری ماحول میں جاری ہے۔

آبنائے ہرمز دنیا کے اہم ترین بحری راستوں میں شمار ہوتی ہے، جہاں سے عالمی سطح پر تیل اور قدرتی گیس کی بڑی مقدار کی ترسیل ہوتی ہے۔ اسی وجہ سے اس آبی گزرگاہ سے متعلق ہونے والی ہر پیش رفت پر عالمی برادری اور توانائی کی منڈیاں گہری نظر رکھے ہوئے ہیں۔

عباس عراقچی کے بیان کو خطے میں جاری سفارتی کوششوں کے تناظر میں اہم پیش رفت قرار دیا جا رہا ہے، تاہم معاہدے کی حتمی تفصیلات اور شرائط کے بارے میں ابھی کوئی باضابطہ اعلان سامنے نہیں آیا۔