عباس عراقچی: لبنان سمیت تمام محاذوں پر جنگ بندی یقینی بنانا امریکہ کی ذمہ داری ہے

(تہران) ایرانی وزیر خارجہ عباس عراقچی نے کہا ہے کہ اسلام آباد مفاہمتی یادداشت کے مطابق لبنان سمیت تمام محاذوں پر جنگ بندی کو یقینی بنانا امریکہ کی ذمہ داری ہے، جبکہ معاہدے پر مکمل عملدرآمد کے لیے عالمی حمایت ناگزیر قرار دی گئی ہے۔

ایرانی میڈیا کے مطابق عباس عراقچی اور فرانسیسی وزیر خارجہ کے درمیان ٹیلیفونک رابطہ ہوا، جس میں دونوں رہنماؤں نے خطے کی صورتحال، مفاہمتی یادداشت پر عملدرآمد اور سفارتی پیش رفت پر تبادلہ خیال کیا۔

گفتگو کے دوران عباس عراقچی نے کہا کہ اسلام آباد میں طے پانے والی مفاہمتی یادداشت پر مؤثر عملدرآمد کے لیے اقوام متحدہ کی سلامتی کونسل سمیت عالمی برادری کی حمایت ضروری ہے۔ انہوں نے زور دیا کہ معاہدے کے تحت لبنان سمیت مختلف محاذوں پر جنگ بندی برقرار رکھنا امریکہ کی ذمہ داری ہے۔

ایرانی وزیر خارجہ نے ایران اور فرانس کے درمیان اقتصادی تعاون کے فروغ کے مواقع پر بھی روشنی ڈالی اور دوطرفہ تعلقات کو مزید مستحکم بنانے کی ضرورت پر زور دیا۔

فرانسیسی وزیر خارجہ نے سفارتی عمل کی مکمل حمایت کا اظہار کرتے ہوئے کہا کہ خطے میں دیرپا امن، استحکام اور کشیدگی میں کمی کے لیے مذاکراتی عمل کو آگے بڑھانا ضروری ہے۔

دونوں وزرائے خارجہ نے عالمی قوانین کے مطابق آبنائے ہرمز میں محفوظ اور آزادانہ بحری آمدورفت کی اہمیت پر بھی اتفاق کیا اور بین الاقوامی تجارت کے تسلسل کو یقینی بنانے پر زور دیا۔