پی آئی اے کے نئے سی ای او ایڈرین ہملٹن مانز نے چارج سنبھال لیا

پاکستان انٹرنیشنل ایئرلائنز (پی آئی اے) کے نئے چیف ایگزیکٹو آفیسر (سی ای او) ایڈرین ہملٹن مانز نے اپنے عہدے کا باضابطہ چارج سنبھال لیا ہے۔ انہیں کمرشل ایوی ایشن کے شعبے میں 30 سال سے زائد تجربہ حاصل ہے اور وہ مختلف عالمی ایئرلائنز کی قیادت کر چکے ہیں۔

ایڈرین ہملٹن اس سے قبل عمان، قازقستان اور افریقہ میں تین مختلف ایئرلائنز کے چیف ایگزیکٹو آفیسر کے طور پر خدمات انجام دے چکے ہیں۔ انہیں ہوا بازی کی صنعت میں انتظامی اصلاحات، اداروں کی کارکردگی بہتر بنانے اور پیشہ ورانہ تبدیلیوں کا ماہر سمجھا جاتا ہے۔

پی آئی اے کنسورشیم اور بورڈ آف ڈائریکٹرز نے سبکدوش ہونے والے سی ای او ایئر وائس مارشل عامر حیات کی خدمات کو بھی سراہتے ہوئے ان کا شکریہ ادا کیا۔

بورڈ کے مطابق، ایئر وائس مارشل عامر حیات کے دور میں پی آئی اے کو مشکل ترین حالات اور متعدد چیلنجز کا سامنا رہا، تاہم ان کی قیادت میں ایئرلائن نے اہم کامیابیاں حاصل کیں۔ ان کے دور میں فضائی حفاظت کے معیار میں نمایاں بہتری آئی، یورپ اور برطانیہ کی جانب سے پی آئی اے پر عائد پابندیاں ختم ہوئیں اور ادارے کو نجکاری کے لیے تیار کرنے میں اہم پیش رفت ہوئی۔

چیئرمین پی آئی اے نے نئے سی ای او ایڈرین ہملٹن مانز کو خوش آمدید کہتے ہوئے امید ظاہر کی کہ وہ اپنے وسیع تجربے اور پیشہ ورانہ صلاحیتوں کو بروئے کار لاتے ہوئے ایئرلائن کی خدمات کا معیار مزید بہتر بنائیں گے اور پی آئی اے کو دنیا کی صف اول کی ایئرلائنز میں شامل کرنے میں اپنا کردار ادا کریں گے۔