ایرانی وزیر خارجہ کے سعودی، قطری، ترک اور عمانی ہم منصبوں سے رابطے، خطے میں کشیدگی کم کرنے پر زور

(تہران ) ایران کے وزیر خارجہ سید عباس عراقچی نے مشرقِ وسطیٰ میں بڑھتی ہوئی کشیدگی کے تناظر میں سعودی عرب، قطر، ترکیہ اور عمان کے وزرائے خارجہ سے ٹیلیفونک رابطے کیے، جن میں امریکا اور ایران کے درمیان حالیہ کشیدگی، آبنائے ہرمز کی صورتحال اور خطے کی مجموعی سکیورٹی پر تفصیلی تبادلہ خیال کیا گیا۔

ایرانی وزارت خارجہ کے مطابق عباس عراقچی نے عمان کے وزیر خارجہ بدر بن حمد البوسعیدی اور ترکیہ کے وزیر خارجہ حاقان فیدان سے علیحدہ علیحدہ گفتگو کی۔ دونوں رہنماؤں نے خطے کی تازہ صورتحال، آبنائے ہرمز میں پیدا ہونے والی کشیدگی اور امن و استحکام کے لیے جاری سفارتی کوششوں پر تبادلہ خیال کیا۔

وزارت خارجہ کے بیان کے مطابق تمام وزرائے خارجہ اس بات پر متفق ہوئے کہ مشرقِ وسطیٰ میں مزید کشیدگی کو روکنے کے لیے سفارتی رابطوں کو مؤثر بنایا جائے اور تمام تنازعات کا حل مذاکرات، سیاسی مکالمے اور پرامن ذرائع سے تلاش کیا جائے۔

گفتگو کے دوران ایرانی وزیر خارجہ سید عباس عراقچی نے کہا کہ ایران اپنی خودمختاری، قومی سلامتی اور علاقائی مفادات کے تحفظ کے لیے مکمل طور پر تیار ہے، تاہم تہران خطے میں امن، استحکام اور کشیدگی میں کمی کے لیے سفارتی کوششیں بھی جاری رکھے گا۔

دوسری جانب ترک وزارت خارجہ نے بھی تصدیق کی کہ وزیر خارجہ حاقان فیدان نے اپنے ایرانی ہم منصب سے ٹیلیفون پر رابطہ کیا، جس میں خطے کی موجودہ سکیورٹی صورتحال، جنگ بندی کے امکانات اور کشیدگی کم کرنے کے لیے سفارتی اقدامات پر تبادلہ خیال کیا گیا۔

تجزیہ کاروں کے مطابق ایران کے علاقائی ممالک سے یہ اہم سفارتی رابطے ایسے وقت میں سامنے آئے ہیں جب امریکا اور ایران کے درمیان بڑھتی کشیدگی اور آبنائے ہرمز کی صورتحال پر عالمی برادری کی تشویش میں اضافہ ہوا ہے، جبکہ خطے میں امن برقرار رکھنے کے لیے سفارتی سرگرمیوں میں بھی نمایاں تیزی دیکھی جا رہی ہے۔