اداکارہ نیلم منیر کے ہاں بیٹے کی پیدائش، نام محمد حمدان رکھ دیا

ویب ڈیسک: پاکستانی شوبز انڈسٹری کی معروف اداکارہ نیلم منیر نے اپنے پہلے بچے کی پیدائش کا اعلان کرتے ہوئے بیٹے کا نام محمد حمدان رکھ دیا، جس پر مداحوں اور شوبز شخصیات کی جانب سے مبارک باد اور نیک تمناؤں کا اظہار کیا جا رہا ہے۔

اداکارہ نے یہ خوش خبری سوشل میڈیا پلیٹ فارم انسٹاگرام پر خصوصی انداز میں شیئر کی۔ ان کی جانب سے اس اعلان کے بعد سوشل میڈیا پر ان کے ہاں بچے کی پیدائش سے متعلق جاری قیاس آرائیوں کا خاتمہ ہوگیا۔

نیلم منیر نے انسٹاگرام پر ایک تصویر شیئر کی، جس میں وہ اسپتال کے بستر پر اپنے نومولود بیٹے کو گود میں لیے بیٹھی دکھائی دے رہی ہیں۔ تصویر میں اداکارہ نے گہرے رنگ کا اسپتال کا لباس پہن رکھا ہے، جبکہ ان کا بیٹا سفید کمبل میں لپٹا ہوا ہے۔ اداکارہ نے بچے کا چہرہ ایموجی کے ذریعے چھپا رکھا ہے۔

تصویر کے ساتھ اپنے پیغام میں نیلم منیر نے لکھا کہ وہ لمحہ جب وہ کسی کی پوری دنیا بن گئیں۔ انہوں نے اپنے بیٹے کو اپنی قبول ہونے والی دعا اور زندگی کی سب سے بڑی نعمت قرار دیتے ہوئے لکھا، ”الحمدللہ! میرا ننھا شہزادہ محمد حمدان میری وہ دعا ہے جو قبول ہوئی، میری زندگی کی سب سے بڑی نعمت۔“

اداکارہ کی جانب سے یہ اعلان ایسے وقت میں سامنے آیا جب سوشل میڈیا پر ان کے ہاں بچے کی پیدائش کے حوالے سے مختلف قیاس آرائیاں گردش کر رہی تھیں۔ اس سے قبل ان کے شوہر کے ایک قریبی دوست نے بھی سوشل میڈیا کے مختلف پلیٹ فارمز پر مبارک باد کا پیغام شیئر کیا تھا۔

واضح رہے کہ نیلم منیر نے ہمیشہ اپنی نجی زندگی کو میڈیا کی توجہ سے دور رکھنے کی کوشش کی ہے۔ انہوں نے جنوری 2025 میں دبئی میں مقیم پاکستانی کاروباری شخصیت محمد راشد سے شادی کی تھی۔ شادی کے بعد سے اداکارہ ڈراموں میں بھی نظر نہیں آئیں۔

نیلم منیر کی جانب سے ماں بننے کی خوش خبری شیئر کیے جانے کے بعد مداحوں کی جانب سے انہیں مبارک باد دی جا رہی ہے، جبکہ ان کے بیٹے محمد حمدان کے لیے صحت، خوشیوں اور روشن مستقبل کی دعائیں بھی کی جا رہی ہیں۔