اے آئی سے جعلی ویڈیوز بنانے والوں کو جیل بھیجنا چاہیے، سلمان خان شدید برہم

ممبئی: بالی وڈ سپر اسٹار سلمان خان نے مصنوعی ذہانت (اے آئی) کے ذریعے جعلی ویڈیوز اور آوازیں تیار کرنے والوں پر شدید برہمی کا اظہار کرتے ہوئے ایسے افراد کے خلاف سخت کارروائی کا مطالبہ کیا ہے۔

سلمان خان نے اپنے رئیلیٹی شو ’بگ باس 20‘ میں گفتگو کرتے ہوئے سوشل میڈیا پر اے آئی کے ذریعے تیار کیے جانے والے جعلی مواد کے بڑھتے ہوئے رجحان پر تشویش کا اظہار کیا۔

اے آئی سے آواز تبدیل کرنا انتہائی سنجیدہ معاملہ قرار

سلمان خان کا کہنا تھا کہ کسی کی ویڈیو تیار کرنا یا اے آئی کے ذریعے اس کی آواز تبدیل کرکے پیش کرنا غلط ہے۔ ان کے مطابق مصنوعی ذہانت اس قدر ترقی کرچکی ہے کہ صورتحال انتہائی تشویشناک اور سنجیدہ ہوگئی ہے۔

اداکار نے مثال دیتے ہوئے کہا کہ اگر کسی شخص نے کوئی بات کی اور کسی دوسرے فرد نے اے آئی کے ذریعے اس میں تبدیلی کرکے اسے کسی کو گالی دیتے ہوئے دکھا دیا تو یہ ایک سنگین مسئلہ ہے۔

سلمان خان خود بھی جعلی مواد کا شکار

سلمان خان نے انکشاف کیا کہ وہ خود بھی اے آئی سے تیار کیے گئے جعلی مواد کا نشانہ بن چکے ہیں۔

ان کا کہنا تھا کہ جو لوگ یہ نہیں جانتے کہ کوئی ویڈیو اے آئی کے ذریعے تیار کی گئی ہے، وہ اسے حقیقی سمجھ کر آگے شیئر کرسکتے ہیں۔ تاہم جو افراد حقیقت جانتے ہوئے بھی ایسا مواد تیار کرتے ہیں، ان کے عمل پر سوال اٹھنا چاہیے۔

’ایسے لوگوں کو جیل بھیج دینا چاہیے‘

سلمان خان نے کہا کہ ایسے افراد کے خلاف سخت قانونی کارروائی ہونی چاہیے اور انہیں جیل بھیج دینا چاہیے۔

اداکار کے مطابق جب تک ایک دو ایسے افراد کو جیل نہیں بھیجا جائے گا، اس قسم کا سلسلہ رکنے کا امکان کم ہے۔

انہوں نے اے آئی سے متعلق جعلی مواد کی روک تھام کے لیے قانون سازی کی ضرورت پر بھی زور دیا اور سوشل میڈیا پر مؤثر نگرانی اور سینسرشپ کے نظام کی حمایت کی۔

سلمان خان کے بیان نے اے آئی سے تیار کردہ جعلی یا گمراہ کن مواد کے بڑھتے ہوئے استعمال اور اس کے ممکنہ اثرات کے حوالے سے ایک بار پھر بحث کو اجاگر کردیا ہے۔