بجلی صارفین کے لیے بڑا اضافہ متوقع، فیول ایڈجسٹمنٹ کی مد میں 1 روپے 73 پیسے فی یونٹ اضافے کی درخواست

اسلام آباد: ملک بھر کے بجلی صارفین کے لیے بجلی مزید مہنگی ہونے کا امکان ہے۔ سینٹرل پاور پرچیزنگ ایجنسی (سی پی پی اے) نے اگست کی ماہانہ فیول ایڈجسٹمنٹ کی مد میں بجلی کی قیمت میں 1 روپے 73 پیسے فی یونٹ اضافے کی درخواست نیشنل الیکٹرک پاور ریگولیٹری اتھارٹی (نیپرا) میں جمع کرا دی ہے۔

درخواست میں کے الیکٹرک سمیت ملک بھر کے صارفین پر اضافی مالی بوجھ پڑنے کا امکان ظاہر کیا گیا ہے۔ نیپرا سی پی پی اے کی درخواست پر آج سماعت کرے گی، جس کے بعد بجلی کی قیمت میں اضافے سے متعلق حتمی فیصلہ کیا جائے گا۔

سی پی پی اے کے مطابق اگست کے دوران ڈسکوز کو مجموعی طور پر 14 ارب 46 کروڑ 40 لاکھ یونٹس بجلی فراہم کی گئی، جبکہ فراہم کی جانے والی بجلی کی اوسط لاگت 8 روپے 82 پیسے فی یونٹ رہی۔

اعداد و شمار کے مطابق اگست میں بجلی کی پیداوار میں پانی کا حصہ 37.84 فیصد، مقامی کوئلے کا 10.88 فیصد اور درآمدی کوئلے کا 15.59 فیصد رہا۔ فرنس آئل سے 2.15 فیصد بجلی پیدا کی گئی۔

اسی عرصے کے دوران مقامی گیس سے 7.04 فیصد جبکہ درآمدی ایل این جی سے 8.48 فیصد بجلی پیدا کی گئی۔

سی پی پی اے کی جانب سے فراہم کردہ تفصیلات کے مطابق فرنس آئل سے بجلی کی پیداواری لاگت 45 روپے 25 پیسے فی یونٹ جبکہ درآمدی ایل این جی سے بجلی کی لاگت 45 روپے 92 پیسے فی یونٹ رہی۔

نیپرا کی سماعت اور اتھارٹی کے حتمی فیصلے کے بعد ہی واضح ہوگا کہ صارفین کے لیے فی یونٹ اضافے کی حتمی شرح کیا مقرر کی جاتی ہے۔