خیبرپختونخوا اور بلوچستان میں سکیورٹی فورسز کی بڑی کارروائیاں، 74 دہشت گرد ہلاک

راولپنڈی: سکیورٹی فورسز نے خیبرپختونخوا اور بلوچستان میں انٹیلی جنس بیسڈ آپریشنز کے دوران مجموعی طور پر 74 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق خیبرپختونخوا کے مختلف علاقوں میر علی اور اورکزئی میں گزشتہ 48 گھنٹوں کے دوران کارروائیاں کی گئیں، جن میں 43 دہشت گرد ہلاک ہوئے۔

آئی ایس پی آر کے مطابق میر علی میں 35 جبکہ اورکزئی میں 8 خوارج کو ہلاک کیا گیا۔ شدید فائرنگ کے تبادلے کے دوران دہشت گردوں کو بھاری نقصان پہنچایا گیا۔

اسلحہ، گولہ بارود اور دھماکا خیز مواد برآمد

ترجمان پاک فوج کے مطابق کارروائیوں کے دوران اسلحہ، گولہ بارود، دیسی ساختہ دھماکا خیز مواد اور آئی ای ڈیز بھی برآمد کی گئیں۔

علاقے میں کلیئرنس اور سینیٹائزیشن آپریشنز جاری ہیں۔ آئی ایس پی آر کا کہنا ہے کہ ملک سے دہشت گردی کے مکمل خاتمے تک آپریشن عزمِ استحکام پوری رفتار سے جاری رہے گا۔

بلوچستان میں مزید 31 دہشت گرد ہلاک

دوسری جانب بلوچستان کے ضلع کوئٹہ کے علاقے کرم میں سکیورٹی فورسز کا انٹیلی جنس بیسڈ آپریشن جاری ہے، جہاں مختلف جھڑپوں کے دوران مزید 31 دہشت گرد ہلاک کر دیے گئے۔

آئی ایس پی آر کے مطابق فتنہ الخوارج اور فتنہ الہندوستان سے تعلق رکھنے والے دہشت گردوں کے متعدد ٹھکانوں کو مؤثر انداز میں نشانہ بنایا گیا۔

کارروائیوں کے دوران دہشت گردوں کے ٹھکانوں سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا۔

پاک فوج کے شعبہ تعلقات عامہ کا کہنا ہے کہ بیرونی سرپرستی میں ہونے والی دہشت گردی کے خاتمے کے لیے سکیورٹی فورسز کی کارروائیاں جاری رہیں گی۔

وزیراعظم شہباز شریف کا سکیورٹی فورسز کو خراج تحسین

وزیراعظم شہباز شریف نے خیبرپختونخوا اور بلوچستان میں کامیاب کارروائیوں کے دوران دہشت گردوں کے ٹھکانوں کو تباہ کرنے اور بھاری مقدار میں اسلحہ و دھماکا خیز مواد برآمد کرنے پر سکیورٹی فورسز کی پیشہ ورانہ مہارت اور جرات کو سراہا ہے۔

وزیراعظم کا کہنا تھا کہ سکیورٹی فورسز کے جوان ملک دشمن عناصر کے ناپاک عزائم ناکام بنانے کے لیے دن رات مصروف عمل ہیں۔

شہباز شریف نے مزید کہا کہ نیشنل ایکشن پلان کے تحت ملک سے غیر ملکی سرپرستی میں ہونے والی دہشت گردی کے مکمل خاتمے تک یہ جنگ پوری قوت کے ساتھ جاری رہے گی۔