پاکستان کا خلیجی ممالک کی خودمختاری اور سلامتی کے تحفظ پر زور، سعودی تنصیبات اور تجارتی جہازوں پر حملوں کی مذمت

نیویارک: پاکستان نے خلیجی ممالک کی خودمختاری، علاقائی سالمیت اور سلامتی کے تحفظ پر زور دیتے ہوئے شہری تنصیبات اور تجارتی جہازوں کو نشانہ بنانے والے تمام حملوں کی غیر مشروط مذمت کی ہے۔

اقوام متحدہ میں پاکستان کے مستقل مندوب سید حیدر شاہ نے کہا ہے کہ پاکستان برادر خلیجی ممالک کی حکومتوں اور عوام کے ساتھ مکمل یکجہتی کا اظہار کرتا ہے۔ سعودی عرب پر حوثی ملیشیا کے حملے اور دھمکیاں ناقابل قبول ہیں۔

سید حیدر شاہ نے سعودی عرب کی شہری تنصیبات اور تجارتی جہازوں کو نشانہ بنانے کی شدید مذمت کرتے ہوئے کہا کہ ایسے اقدامات علاقائی امن و سلامتی کے لیے خطرہ ہیں۔

پاکستانی مندوب کا کہنا تھا کہ آبنائے ہرمز اور باب المندب میں تجارتی جہازوں پر حملے عالمی تجارت کے لیے سنگین خطرہ ہیں۔ آبنائے ہرمز سے عالمی خام تیل اور کھاد کی تجارت کا ایک بڑا حصہ گزرتا ہے، اس لیے ان اہم سمندری راستوں میں کشیدگی کے اثرات عالمی امن، علاقائی استحکام اور توانائی کی قیمتوں پر بھی مرتب ہو رہے ہیں۔

انہوں نے مطالبہ کیا کہ آبنائے ہرمز میں جہازوں کی محفوظ اور بلا رکاوٹ آمدورفت یقینی بنائی جائے۔ اقوام متحدہ کی سلامتی کونسل کو شہریوں، تجارتی جہازوں اور ان کے عملے کے تحفظ کے لیے متحد ہوکر اقدامات کرنے چاہئیں۔

سید حیدر شاہ نے مزید کہا کہ تنازعات کے حل کے لیے کشیدگی میں کمی، مذاکرات اور سفارتکاری کو ترجیح دی جانی چاہیے۔ تمام فوجی اشتعال انگیزیوں اور غیر قانونی حملوں کا سلسلہ بند ہونا ضروری ہے۔

پاکستانی مندوب نے واضح کیا کہ پاکستان خطے میں پائیدار امن، استحکام اور سمندری سلامتی کے قیام کے لیے اپنی سفارتی کوششیں جاری رکھے گا۔