ٹرمپ، شی جن پنگ اور پیوٹن کی آئندہ ہفتے چین میں اہم ملاقات متوقع

شینزین: امریکی صدر ڈونلڈ ٹرمپ، چینی صدر شی جن پنگ اور روسی صدر ولادیمیر پیوٹن کی آئندہ ہفتے چین کے شہر شینزین میں ایشیا پیسیفک اکنامک کوآپریشن (ایپیک) سمٹ کے موقع پر ملاقات متوقع ہے۔

تین بڑی عالمی طاقتوں کے سربراہان کا ایک ہی اجلاس میں اکٹھا ہونا عالمی سیاست اور جوہری طاقتوں کے درمیان تعلقات کے تناظر میں غیر معمولی اہمیت کا حامل قرار دیا جا رہا ہے۔

وائٹ ہاؤس نے جمعہ کے روز تینوں رہنماؤں کی مجوزہ سہ فریقی ملاقات کی تصدیق کردی ہے۔ تاہم تجزیہ کاروں کے مطابق اس اجلاس سے کسی بڑے معاہدے یا فوری اہم پیش رفت کی توقع کم ہے اور ملاقات کی اہمیت زیادہ تر علامتی ہوسکتی ہے۔

یہ مجوزہ اجلاس ایسے وقت میں ہو رہا ہے جب امریکا، چین اور روس کے درمیان مختلف عالمی اور علاقائی معاملات پر اختلافات موجود ہیں۔

امریکی صدر ڈونلڈ ٹرمپ نے گزشتہ سال چین کے ساتھ مختصر تجارتی جنگ کے بعد جنگ بندی کی تھی اور اختلافات کے باوجود چینی صدر شی جن پنگ کے ساتھ تعلقات بہتر بنانے کی کوششیں جاری رکھی ہیں۔

دوسری جانب ٹرمپ روسی صدر ولادیمیر پیوٹن کے ساتھ بھی تعلقات میں بہتری کے خواہاں ہیں، تاہم روس یوکرین کے ساتھ تقریباً پانچ سال سے جاری جنگ میں اپنے مؤقف پر قائم ہے۔ اس کے علاوہ ماسکو اور تہران کے درمیان فوجی، انٹیلی جنس اور سفارتی تعاون میں بھی اضافہ ہوا ہے۔

امریکی صدر ڈونلڈ ٹرمپ کے مطابق مجوزہ ملاقات میں ایران کے ساتھ جاری امریکی جنگ اور تینوں ممالک کے جوہری ہتھیاروں سے متعلق امور پر تبادلہ خیال کا موقع مل سکتا ہے۔

امریکی حکام کا کہنا ہے کہ ٹرمپ ایران جنگ کے معاملے پر شی جن پنگ اور پیوٹن سے گفتگو کرنا چاہتے ہیں، تاہم یوکرین جنگ ان کے مجوزہ مذاکرات کے ایجنڈے میں شامل نہیں ہوگی۔

ادھر امریکا اور روس کے درمیان جوہری ہتھیاروں کو محدود کرنے کا آخری معاہدہ نیو اسٹارٹ رواں سال فروری میں ختم ہوچکا ہے، جس کے بعد دونوں ممالک کے جوہری ہتھیاروں پر عائد کئی دہائیوں پرانی پابندیوں اور حدود کا سلسلہ بھی ختم ہوگیا۔

معاہدے کی مدت ختم ہونے سے قبل ڈونلڈ ٹرمپ نے روس کی جانب سے اس میں مزید ایک سال کی توسیع کی تجویز مسترد کردی تھی اور چین کی شمولیت کے ساتھ ایک نئے، بہتر اور جدید جوہری معاہدے پر زور دیا تھا۔

تینوں عالمی رہنماؤں کی متوقع ملاقات میں جوہری ہتھیاروں کی تحدید، مستقبل کے معاہدوں اور ایران کی صورت حال پر گفتگو کو اہمیت حاصل ہوسکتی ہے۔ تاہم اجلاس کے عملی نتائج اور کسی ممکنہ اتفاق رائے کے حوالے سے حتمی صورت حال ملاقات کے بعد ہی واضح ہوگی۔