امریکا میں فضائی بحران کے بعد آپریشنز بحال ہونا شروع، 13 ہزار سے زائد پروازیں متاثر

واشنگٹن: امریکا میں تکنیکی خرابی کے باعث شدید متاثر ہونے والا فضائی آپریشن بحال ہونا شروع ہوگیا ہے، تاہم حکام کا کہنا ہے کہ پروازوں کا نظام مکمل طور پر معمول پر آنے میں ابھی کافی وقت لگ سکتا ہے۔

امریکی فیڈرل ایوی ایشن ایڈمنسٹریشن (ایف اے اے) نے ملک بھر میں گراؤنڈ اسٹاپ ختم کرنے کا اعلان کرتے ہوئے فضائی آپریشنز کی مرحلہ وار بحالی شروع کردی ہے۔ فضائی نظام میں خرابی کے باعث ہزاروں پروازیں متاثر ہوئیں جبکہ لاکھوں مسافروں کو مشکلات کا سامنا کرنا پڑا۔

امریکی حکام کے مطابق اس واقعے کا مائیکروسافٹ کی سروسز سے کوئی تعلق نہیں اور نہ ہی سائبر حملے کا کوئی واقعہ پیش آیا ہے۔ سیکرٹری ہوم لینڈ سکیورٹی کا کہنا ہے کہ صورتحال درست سمت میں آگے بڑھ رہی ہے اور گراؤنڈ اسٹاپ کے دوران تمام ٹیلی کام اور ریڈار سروسز مکمل طور پر معطل نہیں ہوئیں۔

امریکی وزیر ٹرانسپورٹ کے مطابق ڈیٹا کے حد سے زیادہ دباؤ کے باعث سوئچز اور راؤٹرز بند ہوگئے تھے، جس کے نتیجے میں فضائی ٹریفک کنٹرول کا نظام متاثر ہوا۔ ان کا کہنا تھا کہ فضائی ٹریفک کنٹرول سسٹم کی اپ گریڈیشن کے لیے اب 50 ارب ڈالر درکار ہیں اور جمعے کو پیدا ہونے والی صورتحال سے مکمل طور پر نکلنے میں وقت لگے گا۔

کانگریس سے 50 ارب ڈالر کی ہنگامی فنڈنگ کا مطالبہ

امریکی وزیر ٹرانسپورٹ نے فضائی نظام کو جدید بنانے اور بحال کرنے کے لیے کانگریس سے ہنگامی فنڈنگ فراہم کرنے کا مطالبہ کیا ہے۔

ان کا کہنا ہے کہ غیر مستحکم مواصلاتی نظام کے باعث حکام کو فضائی ٹریفک کنٹرول سسٹم بند کرنا پڑا۔ نظام مکمل طور پر بحال ہونے تک ہزاروں مسافروں کو ایئرپورٹس پر رات گزارنا پڑ سکتی ہے جبکہ پروازوں کی آمد و رفت معمول پر آنے میں مزید وقت لگے گا۔

13 ہزار سے زائد پروازیں متاثر، لاکھوں مسافر پریشان

اس سے قبل امریکی ایوی ایشن حکام نے تکنیکی خرابی کے باعث ملک کے تمام ہوائی اڈوں پر پروازوں کی روانگی روکنے کا اعلان کیا تھا۔

ایف اے اے کے مطابق تکنیکی خرابی سے ریڈار اور ایئر ٹریفک کنٹرول کی صلاحیت متاثر ہوئی جبکہ امریکی وزیر ٹرانسپورٹ کا کہنا تھا کہ اس خرابی سے 22 ایئر ٹریفک کنٹرول مراکز متاثر ہوئے۔ ایف اے اے کے تکنیکی ماہرین واقعے کی وجوہات جاننے کے لیے تحقیقات کر رہے ہیں۔

میڈیا رپورٹس کے مطابق امریکا میں فضائی آپریشن معطل ہونے سے ایشیا، یورپ اور کینیڈا سمیت دنیا بھر میں 26 ہزار سے زائد پروازیں تاخیر کا شکار ہوئیں، تین ہزار پروازیں منسوخ ہوئیں جبکہ تقریباً 15 لاکھ مسافروں کو مشکلات کا سامنا کرنا پڑا۔

خبر ایجنسی کے مطابق امریکی تحقیقاتی ادارے ایف بی آئی کی جانب سے بھی معاملے کی تحقیقات کی جارہی ہیں۔

سائبر حملے اور اے آئی کا امکان زیرِ غور

ہوم لینڈ سکیورٹی چیف مارک وین مولن نے عوام کو یقین دہانی کرائی کہ انہیں خوفزدہ ہونے کی ضرورت نہیں اور صدر ڈونلڈ ٹرمپ کو صورتحال سے آگاہ کردیا گیا ہے۔

ان کا کہنا تھا کہ تمام پروازوں کا ریکارڈ موجود ہے اور ایئر ٹریفک کنٹرول مراکز میں مواصلاتی خرابی کے باعث پروازیں روکنے کا فیصلہ کیا گیا تھا۔ انہوں نے واضح کیا کہ یہ نائن الیون جیسا کوئی واقعہ نہیں اور گراؤنڈ اسٹاپ کسی سکیورٹی خطرے کے پیش نظر نہیں لگایا گیا۔

تاہم انہوں نے فضائی نظام میں خرابی کے حوالے سے مصنوعی ذہانت اور سائبر حملے کے امکان کو مکمل طور پر رد نہیں کیا تھا۔

دوسری جانب امریکی ٹی وی رپورٹس کے مطابق فضائی نظام کی خرابی کے دوران ریڈیو فریکوئنسیز بھی متاثر ہوئیں جبکہ وال اسٹریٹ جرنل نے بھی ملک بھر میں 13 ہزار سے زائد پروازوں کے متاثر ہونے کی رپورٹ دی تھی۔

یورپ سے امریکا جانے والی پروازیں بھی متاثر

یوروکنٹرول کے مطابق امریکی فضائی نظام میں خرابی کے باعث یورپ سے امریکا جانے والی پروازیں بھی عارضی طور پر معطل کردی گئی تھیں۔

ادھر مائیکروسافٹ نے واضح کیا کہ فضائی نظام کی خرابی کا اس کی سروسز سے کوئی تعلق نہیں، جبکہ امریکی صدر ڈونلڈ ٹرمپ نے بھی اپنے بیان میں کہا تھا کہ پروازوں کے بحران کی وجہ سائبر حملہ یا مصنوعی ذہانت معلوم نہیں ہوتی۔

اس دوران امریکی محکمہ موسمیات کو بھی ملک گیر انٹرنیٹ اور مواصلاتی نظام میں خرابی کا سامنا کرنا پڑا، جس کے باعث اس کی ویب سائٹس پر موسمی معلومات تک رسائی متاثر ہوئی۔ محکمہ موسمیات کے مطابق تکنیکی ماہرین مسئلہ حل کرنے میں مصروف ہیں۔