وفاقی آئینی عدالت میں علی امین گنڈاپور کی بطور وزیر اعلی بحالی کی درخواست دائر

(اسلام آباد) خیبرپختونخوا کے سابق وزیر اعلیٰ علی امین گنڈاپور کی بطور وزیر اعلیٰ بحالی کیلئے وفاقی آئینی عدالت میں درخواست دائر کر دی گئی ہے۔ درخواست شیر افضل مروت کی جانب سے جمع کرائی گئی، جس میں علی امین گنڈاپور کے استعفے کو غیر آئینی اور کالعدم قرار دینے کی استدعا کی گئی ہے۔

درخواست کے متن میں مؤقف اختیار کیا گیا ہے کہ علی امین گنڈاپور کو غیر قانونی طور پر ڈی نوٹیفائی کیا گیا اور یہ اقدام آئین کے منافی ہے۔ درخواست گزار کے مطابق سابق وزیر اعلیٰ سے استعفیٰ دباؤ کے تحت لیا گیا جبکہ اس کی کوئی قانونی حیثیت نہیں۔

درخواست میں مزید کہا گیا ہے کہ علی امین گنڈاپور کا استعفیٰ “ایک سزایافتہ اور نااہل فرد واحد” کی ڈکٹیشن پر لیا گیا، اس لیے اس بنیاد پر ہونے والے تمام اقدامات کو غیر آئینی قرار دیا جائے۔

عدالت سے استدعا کی گئی ہے کہ سہیل آفریدی کی بطور وزیر اعلیٰ تقرری کا نوٹیفکیشن کالعدم قرار دے کر علی امین گنڈاپور کو دوبارہ وزیر اعلیٰ خیبرپختونخوا کے عہدے پر بحال کیا جائے۔

درخواست میں یہ بھی مطالبہ کیا گیا ہے کہ غیر آئینی اقدامات کے نتیجے میں کیے گئے تمام سرکاری فیصلوں کو منسوخ کیا جائے۔