لاہور میں غیرملکی لڑکی سے مبینہ زیادتی، تین ملزمان حراست میں

لاہور : لاہور کے علاقے ڈیفنس میں غیرملکی لڑکی سے مبینہ زیادتی کے واقعے میں پولیس نے تین افراد کو حراست میں لے لیا ہے۔

پولیس ذرائع کے مطابق تینوں افراد کو مبینہ طور پر سہولت کاری کے شبہے میں حراست میں لیا گیا، جبکہ مرکزی ملزم کے ایک رشتہ دار کے گھر سے واقعے میں استعمال ہونے والی گاڑی بھی برآمد کرلی گئی ہے۔ متاثرہ لڑکی کا ابتدائی طبی معائنہ بھی کرایا گیا ہے۔

تفتیشی ذرائع کے مطابق متاثرہ لڑکی کی سفری تاریخ بھی سامنے آئی ہے۔ وہ رواں سال مارچ اور مئی میں دو مرتبہ پاکستان آچکی ہے۔ ذرائع کے مطابق وہ 4 مارچ کو تاشقند سے لاہور پہنچی اور 20 مارچ کو باکو روانہ ہوئی، جبکہ 22 مئی کو باکو سے دوبارہ پاکستان آئی۔ تقریباً 15 روز قبل وہ تیسری مرتبہ لاہور پہنچی۔

ذرائع کا کہنا ہے کہ غیرملکی لڑکی کپڑے کے کاروبار کے سلسلے میں لاہور اور فیصل آباد آتی جاتی رہی ہے اور اردو سمجھنے اور بولنے کی صلاحیت بھی رکھتی ہے۔

ابتدائی تفتیش میں یہ بات بھی سامنے آئی ہے کہ لڑکی کی مختلف افراد سے ملاقاتیں ہوتی رہی ہیں، جبکہ پنجاب اسمبلی میں اس کی موجودگی کی ایک تصویر بھی سامنے آئی ہے۔ پولیس واقعے کے مختلف پہلوؤں کی تحقیقات جاری رکھے ہوئے ہے۔