صدر اور وزیراعظم ملاقات: پیپلزپارٹی کی متعدد بجٹ تجاویز منظور، تعاون پر آمادگی کا اظہار

(اسلام آباد) صدرِ مملکت آصف علی زرداری اور وزیراعظم محمد شہباز شریف کے درمیان ایوانِ صدر میں ہونے والی اہم ملاقات میں آئندہ وفاقی بجٹ، ملکی سیاسی صورتحال، قومی سلامتی اور دیگر اہم امور پر تفصیلی تبادلہ خیال کیا گیا، جبکہ ذرائع کے مطابق حکومت نے پاکستان پیپلز پارٹی کی متعدد بجٹ تجاویز بھی تسلیم کر لی ہیں۔

ملاقات میں نائب وزیراعظم و وزیر خارجہ اسحاق ڈار، وزیر داخلہ محسن نقوی، وزیر قانون اعظم نذیر تارڑ، وزیر خزانہ محمد اورنگزیب، وزیراعظم کے مشیر برائے سیاسی امور رانا ثناء اللہ سمیت دونوں جماعتوں کی اہم سیاسی شخصیات شریک ہوئیں۔

اجلاس میں قومی سلامتی، داخلی و علاقائی صورتحال، معاشی چیلنجز، آئندہ مالی سال کے بجٹ، گلگت بلتستان کے حالیہ انتخابات، آزاد کشمیر کی صورتحال، امن و امان اور دیگر قومی اہمیت کے معاملات زیر غور آئے۔

صدر آصف علی زرداری نے بجٹ سے متعلق گفتگو کرتے ہوئے عوامی فلاح، صوبوں کے حقوق اور معاشی استحکام کو ترجیح دینے پر زور دیا۔ انہوں نے ہدایت کی کہ ترقیاتی اہداف اور عوامی ریلیف کے منصوبوں میں بہتر توازن قائم کیا جائے تاکہ عام شہریوں کو زیادہ سے زیادہ فائدہ پہنچ سکے۔

وزیر داخلہ محسن نقوی نے اجلاس کے شرکاء کو اپنے حالیہ دورۂ ایران اور علاقائی سفارتی رابطوں کے حوالے سے بریفنگ بھی دی۔

ملاقات میں چیئرمین پاکستان پیپلز پارٹی بلاول بھٹو زرداری، وزیراعلیٰ سندھ مراد علی شاہ، وزیراعظم آزاد کشمیر راجہ فیصل راٹھور، راجہ پرویز اشرف، شیری رحمان، نوید قمر، سلیم مانڈوی والا اور احد چیمہ بھی شریک تھے۔

حکومتی ذرائع کے مطابق پیپلز پارٹی نے بجٹ کے معاملے پر حکومت کے ساتھ تعاون کا گرین سگنل دے دیا ہے۔ ذرائع کا کہنا ہے کہ وزیراعظم شہباز شریف نے بلاول بھٹو زرداری کی انتخابی مہم کی تعریف کرتے ہوئے گلگت بلتستان انتخابات میں کامیابی پر مبارکباد بھی دی۔

ذرائع کے مطابق وزیراعظم نے دورانِ گفتگو بلاول بھٹو زرداری کی نوجوانوں میں مقبولیت اور مؤثر سیاسی پیغام رسانی کو سراہا۔ ملاقات میں بجٹ سے متعلق پیپلز پارٹی کی متعدد تجاویز پر اتفاق کیا گیا، جبکہ بجٹ پیش کرنے کی تاریخ اور دیگر پارلیمانی معاملات پر مشاورت جاری رکھنے پر بھی اتفاق ہوا۔

سیاسی مبصرین کے مطابق حکومت اور پیپلز پارٹی کے درمیان بڑھتا ہوا تعاون آئندہ بجٹ کی منظوری اور حکومتی استحکام کے لیے اہم پیش رفت تصور کیا جا رہا ہے۔