عاطف اسلم کو جرمنی میں خصوصی اعزاز، اوبر ایرینا کی اعزازی دیوار پر تصویر آویزاں

اسلام آباد: پاکستانی گلوکار عاطف اسلم کو جرمنی کے اوبر ایرینا میں ہاؤس فل کنسرٹ کے بعد خصوصی اعزاز سے نوازا گیا، جبکہ ان کی تصویر بھی ایرینا کی خصوصی اعزازی دیوار پر آویزاں کردی گئی۔

عاطف اسلم کو کنسرٹ کے بعد برلن بڈی بیئر پیش کیا گیا۔ اوبر ایرینا کی اس خصوصی دیوار پر عاطف اسلم کے ساتھ کیٹی پیری، ریحانہ اور ٹومورو ایکس ٹوگیدر سمیت دیگر عالمی فنکاروں کی تصاویر بھی موجود ہیں۔

گلوکار نے سماجی رابطے کی ویب سائٹ پر ایک ویڈیو شیئر کی، جس میں انہوں نے اوبر ایرینا میں اپنے اعزاز سے متعلق دیوار بھی دکھائی۔ عاطف اسلم کی اس کامیابی پر مختلف معروف شخصیات نے انہیں مبارکباد بھی دی۔

اوبر ایرینا میں ستمبر 2008 سے ہاؤس فل یا نمایاں تقریبات میں شرکت کرنے والے فنکاروں اور کھلاڑیوں کو خصوصی برلن بڈی بیئر پیش کرنے کی روایت جاری ہے، جسے جرمن دارالحکومت برلن کی ثقافتی شناخت سے بھی منسلک کیا جاتا ہے۔

عالمی میوزک ٹور پر عاطف اسلم

عاطف اسلم ان دنوں عالمی میوزک ٹور پر ہیں، جس کے تحت نومبر اور دسمبر میں فرانس اور متحدہ عرب امارات میں بھی ان کے کنسرٹس شیڈول ہیں۔

گلوکار نے رواں برس موسیقی کے میدان میں واپسی کرتے ہوئے 15 جون کو لندن کے او ٹو ایرینا میں اپنے نئے موسیقی منصوبے کا اعلان کیا تھا۔ ان کا چوتھا اسٹوڈیو البم ’’صبح آئے نہ‘‘ 31 جولائی 2026 کو ریلیز ہوا۔

یہ 2008 میں ریلیز ہونے والے البم ’’میری کہانی‘‘ کے بعد عاطف اسلم کا پہلا مکمل اسٹوڈیو البم ہے۔

دنیا بھر میں عاطف اسلم کی مقبولیت

عاطف اسلم گزشتہ برس بھی پاکستان کے سب سے زیادہ سنے جانے والے فنکاروں میں شامل رہے۔ ان کی موسیقی کو مجموعی طور پر تقریباً 8 ارب مرتبہ سنا جا چکا ہے، جن میں تقریباً 96 فیصد اسٹریمنگ پاکستان سے باہر ہوئی۔

عاطف اسلم کی موسیقی دنیا کے 184 ممالک میں سنی جاتی ہے، جو ان کی بین الاقوامی مقبولیت اور پاکستانی موسیقی کی عالمی رسائی کو ظاہر کرتی ہے۔