پاکستان میں 5G کی اوسط ڈاؤن لوڈ اسپیڈ 127.74 ایم بی پی ایس ریکارڈ

اسلام آباد: پاکستان میں 5G نیٹ ورک کے رول آؤٹ سے متعلق پاکستان ٹیلی کمیونیکیشن اتھارٹی (پی ٹی اے) کی رپورٹ سامنے آگئی، جس کے مطابق ملک میں 5G کی قومی اوسط ڈاؤن لوڈ اسپیڈ 127.74 ایم بی پی ایس ریکارڈ کی گئی ہے۔

پی ٹی اے نے اوپن سگنل کے تعاون سے 2026 کی دوسری سہ ماہی کی موبائل نیٹ ورک بینچ مارکنگ رپورٹ جاری کی ہے، جس میں ملک کے 20 شہروں میں موبائل نیٹ ورک کے صارفین کے تجربے کا جائزہ لیا گیا اور 4G اور 5G ٹیکنالوجیز کی کارکردگی کا موازنہ کیا گیا۔

رپورٹ کے مطابق پاکستان میں 5G کی ڈاؤن لوڈ اسپیڈ 4G کے مقابلے میں تقریباً 6.8 گنا زیادہ ریکارڈ ہوئی، جبکہ 5G کی قومی اوسط اپ لوڈ اسپیڈ 12.7 ایم بی پی ایس رہی۔

رپورٹ حقیقی صارفین کے ڈیٹا پر مبنی

پی ٹی اے اور اوپن سگنل کی رپورٹ 90 روز کے حقیقی صارفین کے ڈیٹا کی بنیاد پر تیار کی گئی ہے۔ موبائل نیٹ ورک کی کارکردگی کا جائزہ صارفین کے حقیقی استعمال، ویڈیو اسٹریمنگ، کالز اور ویب براؤزنگ سمیت مختلف عوامل کی بنیاد پر لیا گیا۔

اعداد و شمار کے مطابق 5G پر صارفین کے نیٹ ورک استعمال کا وقت 3.95 فیصد جبکہ 4G پر یہ شرح 93.67 فیصد رہی۔

5G پر ویڈیو ایکسپیرینس اسکور 67.33 اور موبائل گیمنگ ایکسپیرینس اسکور 62.05 ریکارڈ کیا گیا۔

5G کے نتائج ابتدائی نوعیت کے ہیں

پی ٹی اے کی رپورٹ میں واضح کیا گیا ہے کہ 5G کے نتائج ابتدائی نوعیت کے ہیں اور انہیں قومی سطح پر نیٹ ورک کی حتمی کارکردگی کا مکمل عکاس قرار نہیں دیا جا سکتا۔

رپورٹ کے مطابق پاکستان میں 5G نیٹ ورک کی تعیناتی ابھی ابتدائی مرحلے میں ہے، جبکہ اس کی کوریج محدود اور 5G استعمال کرنے والے صارفین کی تعداد بھی کم ہے۔

4G کی قومی اوسط اسپیڈ

رپورٹ کے مطابق پاکستان میں 4G کی قومی اوسط ڈاؤن لوڈ اسپیڈ 18.9 ایم بی پی ایس ریکارڈ کی گئی، جبکہ ہائی اینڈ ڈیوائسز پر 4G کی اوسط ڈاؤن لوڈ اسپیڈ 31.3 ایم بی پی ایس رہی۔

4G کی قومی اوسط اپ لوڈ اسپیڈ 5.32 ایم بی پی ایس ریکارڈ کی گئی۔

رپورٹ میں مختلف شہروں کی سطح پر 4G کی ڈاؤن لوڈ اور اپ لوڈ اسپیڈ کے علاوہ ویڈیو اور موبائل گیمنگ ایکسپیرینس کا بھی تقابلی جائزہ پیش کیا گیا ہے۔