اداکارہ صبا قمر نے دسمبر میں شادی کی خبروں پر خاموشی توڑ دی،

کراچی: پاکستان کی معروف اور عالمی شہرت یافتہ اداکارہ صبا قمر نے اپنی شادی سے متعلق سوشل میڈیا پر گردش کرنے والی خبروں پر خاموشی توڑتے ہوئے انہیں مسترد کردیا ہے۔

گزشتہ دنوں سوشل میڈیا پر خبریں سامنے آئی تھیں کہ صبا قمر رواں سال دسمبر میں شادی کرنے والی ہیں، تاہم اداکارہ نے ان خبروں پر اپنے منفرد اور مزاحیہ انداز میں ردعمل دیا ہے۔

صبا قمر نے فوٹو اینڈ ویڈیو شیئرنگ پلیٹ فارم انسٹاگرام پر اپنی اسٹوری میں شادی سے متعلق افواہوں کا اسکرین شاٹ شیئر کیا اور لکھا کہ آخر کون یہ افواہیں پھیلا رہا ہے کہ ان کی دسمبر میں شادی ہورہی ہے؟

اداکارہ کا کہنا تھا کہ وہ کام میں اس قدر مصروف ہیں کہ انہیں گھر جاکر سکون سے نیند پوری کرنے کا وقت بھی نہیں مل رہا۔

شادی کی دعوت کا انتظار مجھے بھی ہے، صبا قمر

صبا قمر نے اپنی انسٹاگرام اسٹوری میں مزید مزاحیہ انداز اپناتے ہوئے لکھا کہ اگر واقعی ان کی شادی ہورہی ہے تو انہیں بھی دعوت نامہ بھیجا جائے کیونکہ انہیں ابھی تک اپنی شادی کا دعوت نامہ موصول نہیں ہوا۔

اداکارہ کے اس دلچسپ ردعمل کے بعد دسمبر میں ان کی شادی سے متعلق گردش کرنے والی خبروں کی حقیقت واضح ہوگئی اور انہوں نے ان افواہوں کی تردید کردی۔

واضح رہے کہ صبا قمر پاکستان کی مقبول اداکاراؤں میں شمار ہوتی ہیں اور اپنی جاندار اداکاری کے باعث پاکستان سمیت بین الاقوامی سطح پر بھی پہچان رکھتی ہیں۔