اسرائیلی فوج کی جانب سے فورک لفٹرز کے فوجی استعمال پر جاپانی کمپنی ٹویوٹا کی تحقیقات شروع

ٹوکیو: جاپان کی معروف صنعتی کمپنی ٹویوٹا نے اسرائیلی فوج کی جانب سے اپنی تیار کردہ فورک لفٹر مشینوں کے فوجی استعمال کی تحقیقات شروع کردی ہیں۔ کمپنی کا کہنا ہے کہ اس کی تیار کردہ صنعتی مشینری فوجی مقاصد کے لیے نہیں بنائی جاتی۔

برطانوی نیوز ویب سائٹ مڈل ایسٹ آئی کی تحقیقاتی رپورٹ کے مطابق اسرائیلی فوج کی جانب سے ٹویوٹا کے فورک لفٹرز کو اسلحے اور گولہ بارود کے ذخیرہ کرنے والے مراکز، اگلے مورچوں پر تعینات فوجی دستوں کو سامان پہنچانے والی سپلائی لائنز اور فوج کے لاجسٹکس کور میں استعمال کیے جانے کے شواہد سامنے آئے ہیں۔

رپورٹ میں اسرائیلی فوج کے سوشل میڈیا اکاؤنٹس پر جاری تصاویر اور ویڈیوز کا حوالہ دیا گیا ہے، جن میں ٹویوٹا کے فورک لفٹرز کو فوجی نوعیت کے مختلف کاموں میں استعمال ہوتے دیکھا جاسکتا ہے۔

اسرائیلی وزارت دفاع سے کروڑوں ڈالر کا معاہدہ

مڈل ایسٹ آئی کے مطابق ٹویوٹا اور اسرائیلی وزارت دفاع کے درمیان 2024 میں بھاری فورک لفٹرز کی فراہمی کے لیے 15 کروڑ 80 لاکھ شیکل (تقریباً 4 کروڑ 98 لاکھ ڈالر) کا معاہدہ ہوا تھا۔

رپورٹ کے مطابق کمپنی نے اسرائیلی وزارت دفاع اور اپنے مقامی ڈسٹری بیوٹر کے ساتھ معاہدہ کیا تھا کہ فراہم کی جانے والی مشینری اور ٹیکنالوجی صرف شہری مقاصد کے لیے استعمال ہوگی۔

تاہم تحقیقاتی رپورٹ میں سامنے آنے والی تصاویر اور ویڈیوز کے بعد کمپنی نے اس بات کی تحقیقات شروع کردی ہیں کہ آیا اس کے طے شدہ معاہدوں کی خلاف ورزی ہوئی ہے یا نہیں۔

معاہدے کی خلاف ورزی ثابت ہونے پر کارروائی کا عندیہ

ٹویوٹا میٹریل ہینڈلنگ کے ترجمان کے مطابق کمپنی کے لیے یہ ممکن نہیں کہ وہ فروخت کے بعد مختلف واسطوں سے دوبارہ فروخت ہونے والی ہر مشین کی نقل و حرکت پر نظر رکھ سکے، تاہم سامنے آنے والی تصاویر اور ویڈیوز کا جائزہ لیا جارہا ہے۔

ترجمان نے کہا کہ اگر ضروری ہوا تو فورک لفٹرز کے غیر مجاز یا نامناسب استعمال کو روکنے کے لیے اقدامات کیے جائیں گے۔

دوسری جانب اسلحہ سازی کی صنعت کے ماہرین نے کمپنی کے معاہدوں اور مصنوعات کے استعمال کی نگرانی کے طریقہ کار پر سوالات اٹھائے ہیں اور مطالبہ کیا ہے کہ تحقیقات کے نتائج سامنے لائے جائیں۔

اسرائیلی فوجی تنصیبات میں فورک لفٹرز کے استعمال کے شواہد

رپورٹ کے مطابق اسرائیلی فوج کے سوشل میڈیا اکاؤنٹس پر ایسی تصاویر بھی سامنے آئی ہیں جن میں ٹویوٹا کے فورک لفٹرز کو میزائل اور گولہ بارود کے مراکز، فوجی تربیتی اڈوں اور اسلحہ سازی کے کارخانوں میں استعمال ہوتے دکھایا گیا ہے۔

تاہم کمپنی کے مطابق کم از کم ایک ایسی مشین پہلے ایک نجی لاجسٹکس کمپنی کو فروخت کی گئی تھی اور بعد میں اس کی ملکیت یا استعمال کے بارے میں کمپنی کے پاس معلومات موجود نہیں تھیں۔

مڈل ایسٹ آئی کی رپورٹ کے مطابق اسرائیلی وزارت دفاع نے اس معاملے پر تبصرہ کرنے سے گریز کیا۔