اسرائیلی فوج کا غزہ میں حماس کے سینئر کمانڈر کو شہید کرنے کا دعویٰ، القسام بریگیڈز نے تصدیق کردی

غزہ: اسرائیلی فوج نے دعویٰ کیا ہے کہ اس نے غزہ کے جنوبی شہر خان یونس میں فضائی حملے کے دوران فلسطینی تنظیم حماس کے عسکری ونگ القسام بریگیڈز کے ایک سینئر کمانڈر کو نشانہ بنایا ہے، جس کے نتیجے میں سمیر ابو یونس جاں بحق ہوگئے۔

اسرائیلی فوج نے اپنے بیان میں حملے کی تصدیق کرتے ہوئے ابتدائی طور پر نشانہ بنائے گئے کمانڈر کی شناخت ظاہر نہیں کی تھی۔

دوسری جانب برطانوی خبر رساں ادارے کے مطابق حماس کے ذرائع نے بتایا کہ خان یونس میں اسرائیلی فضائی حملے کے دوران القسام بریگیڈز کے کمانڈر سمیر ابو یونس جاں بحق ہوئے۔

طبی ذرائع کے مطابق حملہ خان یونس کے علاقے المواسی میں ایک سڑک پر کیا گیا، جس کے نتیجے میں سمیر ابو یونس جاں بحق جبکہ متعدد افراد زخمی ہوگئے۔

القسام بریگیڈز نے کمانڈر کی شہادت کی تصدیق کردی

غزہ کی سول ڈیفنس ایجنسی کے ترجمان محمود بسال نے بتایا کہ امدادی کارکنوں نے حملے کے مقام سے 53 سالہ سمیر ابو یونس کی لاش برآمد کرلی ہے، جبکہ واقعے میں دو افراد زخمی بھی ہوئے۔

بعد ازاں حماس کے عسکری ونگ عزالدین القسام بریگیڈز نے اپنے بیان میں سمیر محمود ابو یونس، جنہیں ابو محمود کے نام سے بھی جانا جاتا تھا، کی شہادت کی تصدیق کرتے ہوئے ان کے اہل خانہ اور ساتھیوں سے تعزیت کا اظہار کیا۔

القسام بریگیڈز کے مطابق سمیر ابو یونس تنظیم کی جنرل ملٹری کونسل کے رکن اور رفح بریگیڈ کے کمانڈر تھے۔

1991 میں القسام بریگیڈز میں شمولیت اختیار کی

القسام بریگیڈز کے بیان کے مطابق سمیر ابو یونس نے 1991 میں تنظیم میں شمولیت اختیار کی تھی اور وہ اس کے ابتدائی ارکان میں شمار ہوتے تھے۔

ان کی شہادت کے اعلان کے بعد غزہ میں اسرائیلی فضائی کارروائیوں اور جنگ بندی کی صورتحال ایک بار پھر توجہ کا مرکز بن گئی ہے۔