آزاد کشمیر الیکشن: پولنگ مکمل، ووٹوں کی گنتی جاری، بھمبر میں بیلٹ باکس نذرِ آتش، 2 پریزائیڈنگ افسر معطل

مظفرآباد: آزاد جموں و کشمیر کے بلدیاتی انتخابات کے پہلے مرحلے میں پولنگ کا وقت ختم ہونے کے بعد ووٹوں کی گنتی کا عمل شروع کر دیا گیا ہے، جبکہ بھمبر کے ایک پولنگ اسٹیشن پر ہنگامہ آرائی کے دوران بیلٹ باکس کو آگ لگا دی گئی۔

تفصیلات کے مطابق بھمبر کے دربار بابا شادی شہید پولنگ اسٹیشن پر شرپسند عناصر نے ہنگامہ آرائی کرتے ہوئے بیلٹ باکس چھین لیا اور اسے نذرِ آتش کر دیا۔ ڈسٹرکٹ ریٹرننگ آفیسر (ڈی آر او) کے مطابق جلائے گئے بیلٹ باکس میں 232 ووٹ موجود تھے۔ حکام کا کہنا ہے کہ اس پولنگ اسٹیشن پر دوبارہ پولنگ کرانے یا نہ کرانے کا فیصلہ بعد میں کیا جائے گا۔

انتخابی حکام کے مطابق مذکورہ پولنگ اسٹیشن کے علاوہ تمام پولنگ مراکز پر مجموعی طور پر صورتحال پرامن رہی اور پولنگ کا عمل بغیر کسی بڑی رکاوٹ کے مکمل ہوا۔

پہلے مرحلے میں میرپور ضلع کی 4، بھمبر کی 3 اور کوٹلی کی 6 نشستوں پر ووٹنگ ہوئی، جہاں مجموعی طور پر 13 حلقوں میں 288 امیدوار مدِ مقابل تھے۔ ان حلقوں میں مسلم لیگ (ن) اور پاکستان پیپلز پارٹی کے امیدواروں کے درمیان سخت مقابلے کی توقع کی جا رہی ہے، جبکہ استحکام پاکستان پارٹی (آئی پی پی) اور آزاد امیدوار بھی انتخابی میدان میں موجود ہیں۔

الیکشن کمیشن کے مطابق میرپور ڈویژن میں مجموعی طور پر 14 لاکھ 437 رجسٹرڈ ووٹرز ہیں، جن میں 7 لاکھ 24 ہزار 811 مرد اور 6 لاکھ 75 ہزار 626 خواتین ووٹرز شامل ہیں۔ انتخابات کے لیے 2 ہزار 316 پولنگ اسٹیشن قائم کیے گئے، جن میں 1,241 کو انتہائی حساس اور 724 کو حساس قرار دیا گیا۔

سکیورٹی کے لیے میرپور ڈویژن میں 18 ہزار 560 پولیس اور دیگر قانون نافذ کرنے والے اداروں کے اہلکار تعینات کیے گئے، جبکہ پاک فوج کے 2 ہزار 100 جوان بھی انتخابی ڈیوٹی پر مامور رہے۔

چیف الیکشن کمشنر آزاد کشمیر جسٹس (ر) غلام مصطفیٰ مغل نے کہا کہ ووٹنگ کے عمل میں رکاوٹ ڈالنے والوں کے خلاف قانون کے مطابق سخت کارروائی کی جائے گی۔

دوسری جانب چیف سیکرٹری آزاد جموں و کشمیر خوشحال خان نے کہا کہ عوام نے جمہوری عمل پر اعتماد کا اظہار کیا ہے اور امن و امان خراب کرنے والوں کے خلاف بلا امتیاز کارروائی ہوگی۔

آئی جی پولیس آزاد کشمیر لیاقت علی ملک نے بھی واضح کیا کہ کسی بھی فرد یا سیاسی کارکن کو قانون ہاتھ میں لینے کی اجازت نہیں دی جائے گی اور کسی بھی ناخوشگوار واقعے کی صورت میں فوری کارروائی عمل میں لائی جائے گی۔

ادھر الیکشن کمیشن آزاد کشمیر نے مبینہ بے ضابطگی پر دو پریزائیڈنگ افسران کو معطل کر دیا۔ ترجمان الیکشن کمیشن کے مطابق دونوں افسر پولنگ اسٹیشن کے بجائے نجی رہائش گاہ چلے گئے تھے، جس پر ریٹرننگ افسر نے پولنگ بیگز اپنی تحویل میں لے کر نئے پریزائیڈنگ افسران تعینات کر دیے۔ معطل افسران کے خلاف انتخابی قوانین کے تحت کارروائی جاری ہے۔

واضح رہے کہ اس سے قبل مسلم لیگ (ن) کے رہنما رانا ثناء اللہ نے حلقہ ایل اے 10 کوٹلی میں مبینہ بے ضابطگیوں پر انتخاب روکنے اور واقعے کی تحقیقات کا مطالبہ کیا تھا۔