سرگودھا: اسکول ٹیچر کے خلاف بچوں سے جنسی زیادتی کے الزامات، ابتدائی میڈیکل رپورٹس میں تصدیق

سرگودھا: اسکول ٹیچر کے خلاف کمسن طلبہ سے مبینہ جنسی زیادتی کے کیس میں اہم پیش رفت سامنے آئی ہے، جہاں دو بچوں کی ابتدائی میڈیکل رپورٹس میں جنسی زیادتی کی تصدیق ہوئی ہے۔ پولیس کے مطابق کیس کی مزید تحقیقات جاری ہیں جبکہ حتمی میڈیکل اور ڈی این اے رپورٹس کا انتظار ہے۔

پولیس حکام کے مطابق گرفتار اسکول ٹیچر اور دو مبینہ سہولت کاروں سے برآمد کیے گئے لیپ ٹاپ اور موبائل فون فرانزک تجزیے کے لیے بھجوا دیے گئے ہیں۔ ان آلات کی جانچ سے کیس کی تحقیقات میں مزید اہم شواہد سامنے آنے کی توقع ہے۔

پولیس کا کہنا ہے کہ اس معاملے میں چھ روز قبل اسکول ٹیچر اور دو مبینہ سہولت کاروں کے خلاف مقدمہ درج کیا گیا تھا۔ مقدمے میں نامزد مرکزی ملزم سمیت تینوں افراد اس وقت کرائم کنٹرول ڈیپارٹمنٹ (سی سی ڈی) کی حراست میں ہیں۔

حکام کے مطابق ابتدائی میڈیکل رپورٹس سامنے آنے کے بعد کیس کی تفتیش مزید اہمیت اختیار کر گئی ہے۔ حتمی میڈیکل اور ڈی این اے رپورٹس موصول ہونے کے بعد شواہد کا مزید جائزہ لیا جائے گا۔

واقعے کی تحقیقات جاری ہیں، جبکہ پولیس کی جانب سے فرانزک رپورٹس اور دیگر شواہد کی روشنی میں مزید قانونی کارروائی متوقع ہے۔