خیبرپختونخوا میں منکی پاکس کے کیسز میں اضافہ، 72 گھنٹوں میں 4 نئے مریض سامنے آگئے

پشاور: خیبرپختونخوا میں منکی پاکس (ایم پاکس) کے کیسز میں اضافہ دیکھنے میں آیا ہے، جہاں گزشتہ 72 گھنٹوں کے دوران وائرس کے مزید 4 کیسز رپورٹ ہوئے ہیں۔ نئے کیسز سامنے آنے کے بعد صوبے میں ایم پاکس سے متاثرہ افراد کی مجموعی تعداد 18 ہوگئی ہے۔

محکمہ صحت خیبرپختونخوا کے مطابق صوبے میں منکی پاکس کے سب سے زیادہ 5 کیسز پشاور سے رپورٹ ہوئے ہیں، جبکہ وائرس کے باعث ایک شخص کی موت بھی ہوچکی ہے۔

محکمہ صحت نے شہریوں کو منکی پاکس کی علامات سے متعلق آگاہ کرتے ہوئے بتایا ہے کہ بخار، سر درد، جسم میں درد اور جلد پر دانے یا چھالے نمودار ہونا اس بیماری کی نمایاں علامات میں شامل ہیں۔

حکام کے مطابق وائرس سے بچاؤ کے لیے احتیاطی تدابیر اختیار کرنا ضروری ہے۔ شہریوں کو ہدایت کی گئی ہے کہ وہ متاثرہ افراد سے قریبی رابطے سے گریز کریں اور بیماری کی علامات ظاہر ہونے کی صورت میں طبی معائنہ کروائیں۔

خیبرپختونخوا میں نئے کیسز سامنے آنے کے بعد صحت عامہ کے حوالے سے احتیاطی تدابیر کی اہمیت بڑھ گئی ہے۔ شہریوں کو چاہیے کہ وہ علامات ظاہر ہونے پر بروقت طبی مدد حاصل کریں اور دوسروں کو ممکنہ طور پر وائرس منتقل ہونے سے بچانے کے لیے احتیاط برتیں۔