امریکا کی ناکامی مذاکراتی معاہدے میں درج ہو چکی، جنگی کامیابی نے مضبوط بنیاد فراہم کی: باقر قالیباف

(تہران) ایران کے چیف مذاکرات کار اور پارلیمنٹ کے اسپیکر محمد باقر قالیباف نے کہا ہے کہ حالیہ جنگ بندی اور مذاکراتی معاہدہ امریکا کی ناکامی کا واضح اور دستاویزی ثبوت ہے، جبکہ ایران میدانِ جنگ میں اپنی کامیابیوں کے بعد مضبوط پوزیشن سے مذاکرات کر رہا ہے۔

ایرانی پریس ٹی وی کو دیے گئے ایک انٹرویو میں باقر قالیباف نے کہا کہ ایران آج اعتماد اور طاقت کی پوزیشن میں کھڑا ہے اور حالیہ مذاکرات اسی وجہ سے ممکن ہوئے ہیں کہ ایران نے میدانِ جنگ میں اپنی صلاحیتوں کا بھرپور مظاہرہ کیا۔

انہوں نے کہا کہ ایران کی طاقت کو آج دوست اور مخالف دونوں تسلیم کر رہے ہیں، جو ماضی کے مقابلے میں ایک نمایاں تبدیلی ہے۔ ان کے بقول موجودہ مذاکرات اور سابقہ مذاکرات کے درمیان بنیادی فرق یہی ہے کہ ایران اب عسکری اور اسٹریٹجک کامیابیوں کے ساتھ سفارتی میدان میں داخل ہوا ہے۔

باقر قالیباف نے زور دیتے ہوئے کہا کہ کسی بھی جنگی کامیابی کو سیاسی اور قانونی کامیابی میں تبدیل کرنا ناگزیر ہوتا ہے، کیونکہ مضبوط قانونی اور سیاسی دستاویزات کے بغیر عسکری فتوحات دیرپا نتائج نہیں دے سکتیں۔

انہوں نے کہا کہ مذاکرات کا اصل مقصد قومی مفادات کا تحفظ، خطے میں استحکام اور ایک ایسے پائیدار حل کا حصول ہے جو ایران کے حقوق اور مفادات کی ضمانت دے سکے۔ ان کے مطابق ایران اپنی عسکری کامیابیوں کو سفارتی محاذ پر بھی مؤثر انداز میں استعمال کر رہا ہے۔

آبنائے ہرمز کے حوالے سے بات کرتے ہوئے قالیباف نے کہا کہ یہ اہم بحری گزرگاہ جنگ سے پہلے والی صورتحال میں واپس نہیں جائے گی۔ انہوں نے واضح کیا کہ آبنائے ہرمز پر خودمختاری ایران کا حق ہے اور ایران وہاں فراہم کی جانے والی خدمات کے عوض فیس وصول کرنے کا اختیار رکھتا ہے۔

انہوں نے مزید کہا کہ اہم بحری راستے سے گزرنے والے جہازوں سے 60 دن کے بعد فیس وصول کرنے کا عمل شروع کیا جائے گا، جس کے لیے متعلقہ انتظامات مکمل کیے جا رہے ہیں۔

محمد باقر قالیباف نے اس عزم کا اظہار کیا کہ ایران اپنی فوجی کامیابیوں کو ایک ایسے جامع اور پائیدار معاہدے میں تبدیل کرے گا جو ملک کے طویل المدتی قومی مفادات کا مکمل تحفظ کر سکے۔