پاکستانیوں کے لیے بڑی خبر، درجنوں ممالک کے ساتھ ویزا استثنیٰ کے معاہدے

اسلام آباد: پاکستان نے درجنوں دوست ممالک کے ساتھ ویزا استثنیٰ کے معاہدے کرلیے ہیں، تاہم ان معاہدوں کا بنیادی اطلاق سفارتی اور سرکاری پاسپورٹ رکھنے والے افراد پر ہوگا۔

تفصیلات کے مطابق مختلف ممالک کے ساتھ معاہدوں کے تحت بغیر ویزا قیام کی مدت ایک سے تین ماہ تک مقرر کی گئی ہے۔ ایف آئی اے اور متعلقہ زونز کو ویزا استثنیٰ سے متعلق تازہ فہرست کے مطابق کارروائی کی ہدایت بھی کردی گئی ہے۔

فہرست میں ارجنٹائن، آذربائیجان، بحرین، بنگلا دیش اور ترکیہ سمیت متعدد ممالک شامل ہیں۔

اسی طرح مصر، انڈونیشیا، ایران، کویت، ملائیشیا، روس اور سعودی عرب بھی ویزا استثنیٰ والے ممالک کی فہرست میں شامل ہیں۔

متحدہ عرب امارات، تھائی لینڈ، قطر اور نیپال سمیت دیگر ممالک بھی ان معاہدوں کا حصہ ہیں۔

واضح رہے کہ دستیاب معلومات کے مطابق یہ ویزا استثنیٰ عام پاکستانی پاسپورٹ رکھنے والے تمام شہریوں کے لیے عمومی ویزا فری سفر کا اعلان نہیں، بلکہ بنیادی طور پر سفارتی اور سرکاری پاسپورٹ ہولڈرز سے متعلق ہے۔