امریکی انتخابات میں مداخلت کا خدشہ، کیلیفورنیا کے گورنر کا ججوں کو ٹرمپ انتظامیہ کے خلاف خبردار رہنے کا مطالبہ

کیلیفورنیا :امریکا میں وسط مدتی انتخابات سے قبل وفاقی حکومت اور ریاست کیلیفورنیا کے درمیان انتخابی معاملات پر قانونی تنازع شدت اختیار کرگیا، جہاں کیلیفورنیا کے گورنر گیون نیوزم نے وفاقی ججوں سے مطالبہ کیا ہے کہ وہ صدر ڈونلڈ ٹرمپ کی انتظامیہ کی جانب سے بیلٹ پیپرز اور انتخابی مواد ضبط کرنے کی ممکنہ کوششوں کے خلاف چوکس رہیں۔

خبر رساں ادارے رائٹرز کے مطابق ڈیموکریٹ گورنر گیون نیوزم نے ہفتے کے روز وفاقی ججوں کو خط لکھ کر خدشہ ظاہر کیا کہ محکمہ انصاف انتخابی نتائج کی حتمی تصدیق سے قبل وفاقی ایجنٹوں کے ذریعے بیلٹ پیپرز اور انتخابی دستاویزات قبضے میں لینے کے لیے سرچ وارنٹ حاصل کرسکتا ہے۔

غیر شہریوں کی ووٹنگ کا معاملہ تنازع کی وجہ بن گیا

یہ تنازع ٹرمپ انتظامیہ کی جانب سے کیلیفورنیا سے انتخابی ریکارڈ طلب کرنے کے بعد سامنے آیا ہے۔ امریکی محکمہ انصاف کا دعویٰ ہے کہ ریاست میں 20 ہزار سے زائد ایسے افراد ووٹرز کے طور پر رجسٹرڈ ہیں جو امریکی شہری نہیں ہیں۔

تاہم کیلیفورنیا کی ریاستی حکومت اور متعدد ماہرین نے وفاقی حکومت کی فراہم کردہ فہرست کی درستگی پر سوالات اٹھائے ہیں۔ محکمہ انصاف نے بھی تاحال یہ واضح نہیں کیا کہ فہرست میں شامل کتنے افراد نے حقیقتاً ڈاک کے ذریعے ووٹ ڈالے ہیں۔

اپیل کورٹ سے ٹرمپ انتظامیہ کو دھچکا

رائٹرز کے مطابق جمعے کے روز امریکی اپیل کورٹ نے ٹرمپ انتظامیہ کی جانب سے انتخابی ریکارڈ کے معاملے میں کیلیفورنیا کے خلاف دائر درخواست مسترد کردی، جس کے بعد معاملہ سپریم کورٹ تک پہنچنے کا امکان پیدا ہوگیا ہے۔

اس کے علاوہ ایک وفاقی جج نے محکمہ انصاف کو حکم دیا ہے کہ وہ ان ریاستی اور مقامی انتخابی اہلکاروں کے خلاف مقدمات چلانے کی دھمکیاں بند کرے جو وفاقی حکومت کے انتخابی مطالبات سے اتفاق نہیں کرتے۔

گیون نیوزم کا انتخابی عمل میں مداخلت کا خدشہ

گیون نیوزم نے اپنے خط میں خدشہ ظاہر کیا کہ وفاقی حکومت کی جانب سے سرچ وارنٹ کے ذریعے بیلٹ پیپرز ضبط کرنے کی کوشش ریاست میں ووٹوں کی قانونی گنتی اور انتخابی نتائج کی تصدیق کے عمل میں مداخلت کا باعث بن سکتی ہے۔

ان کا مؤقف ہے کہ امریکی آئین کے تحت انتخابات کے انتظام کی بنیادی ذمہ داری ریاستوں کے پاس ہے، اس لیے وفاقی حکومت کے اقدامات ریاست کے انتخابی اختیارات اور قانونی عمل کو متاثر کرسکتے ہیں۔

امریکا میں 3 نومبر کو ہونے والے وسط مدتی انتخابات سے قبل یہ تنازع انتخابی شفافیت، ریاستی خودمختاری اور وفاقی حکومت کے اختیارات کے حوالے سے ایک اہم قانونی معاملہ بن گیا ہے۔