پہلا انتخابی مرحلہ آزادانہ، منصفانہ اور شفاف انداز میں مکمل ہوا، چیف الیکشن کمشنر آزاد کشمیر

مظفرآباد: چیف الیکشن کمشنر آزاد جموں و کشمیر جسٹس (ر) غلام مصطفیٰ مغل نے کہا ہے کہ آزاد کشمیر کے انتخابات کے پہلے مرحلے کا انعقاد آزادانہ، منصفانہ اور شفاف انداز میں مکمل ہوا، جس میں تمام سیاسی جماعتوں نے بھرپور انداز میں حصہ لیا۔

پریس کانفرنس سے خطاب کرتے ہوئے چیف الیکشن کمشنر نے کہا کہ پولنگ مجموعی طور پر پرامن ماحول میں اختتام پذیر ہوئی اور ووٹرز نے بڑی تعداد میں اپنے جمہوری حقِ رائے دہی کا استعمال کیا، جو انتخابی عمل پر عوام کے اعتماد کا اظہار ہے۔

جسٹس (ر) غلام مصطفیٰ مغل نے بتایا کہ ضلع سماہنی میں پولنگ کے دوران رکاوٹ ڈالنے کی کوشش کرنے والے افراد کو فوری طور پر گرفتار کر لیا گیا، جس کے باعث انتخابی عمل متاثر نہیں ہوا اور پولنگ مقررہ ضابطوں کے مطابق جاری رہی۔

انہوں نے کہا کہ انتخابات کے دوران امن و امان برقرار رکھنے کے لیے قانون نافذ کرنے والے اداروں نے انتہائی مؤثر اور مثالی کردار ادا کیا، جس کے باعث مجموعی انتخابی ماحول پرامن رہا۔

چیف الیکشن کمشنر نے انتخابی عمل میں حصہ لینے والی تمام سیاسی جماعتوں، امیدواروں، انتخابی عملے، سیکیورٹی اداروں اور ووٹرز کے تعاون کو سراہتے ہوئے امید ظاہر کی کہ آئندہ مراحل بھی اسی نظم و ضبط اور شفافیت کے ساتھ مکمل ہوں گے۔